Salomon Fehrenbach

Dr Salomon Fehrenbach (* 7. Jänner 1812 z St. Märge; † 18. Augschte 1892 z Fryburg) isch e baadische Jurischt, Haimetdiichter un liberaale Bolitiker gsii.

Lääbe

Dr Fehrenbach isch as Buurebue uf d Wält chuu un het bis er 14 Johr alt gsii isch uf em Fäöld gschafft un as Hiirtebue. Derno isch er uf d Mittelschuel z Eschinge gange un het vu 1833 bis 1837 Räächtwisseschafte un Filosofy an dr Uniwersiteet Fryburg studiert. In dr Zyt vu sym Studium isch er 1831/32 Mitgliid vu dr Burschenschaft Euthymia Freiburg woore.

No dr Staatsbriefig 1837 isch er in Staatsdienscht yydrätte. Är het vu 1837 bis 1839 as Aktuar bim Beziirksamt Stocke gschafft, derno bis 1843 as Räächtspraktikant bim Landamt z Fryburg, bim Beziirksamt Ettlinge (1839–1841) un bim Beziirksamt Känzinge. Anne 1843 isch er deert Assessor woore un isch as soonige 1845 an Beziirksamt Säckige gange, 1845 an s Beziirksamt Schopfe un 1846 wider an s Beziirksamt Säckige. Vu 1847 bis 1892 het dr Fehrenbach as Räächtsaawalt gschafft, aafangs z Säckige, ab 1850 z Fryburg.

Vum 27. Juni 1848 bis zum Änd vum „Rumpfbarleänt“ im Juuni 1849 het dr Fehrenbach dr Frankfurter Nazionaalversammlig as Abgoordnete fir Schopfe aagheert. Syt April 1849 isch er deert Mitgliid vum Uusschuss fir d Duurfierig vu dr Ryychsverfassig gsii.

Anne 1850 isch er us Säckige wäge „Ufruer“ uusgwiise woore, 1852 isch er wäge „Bsitz vu ufriererische Schrifte“ zue Feschtigshaft verurdailt woore.

E freie Gedankenuusdusch het s in dr Fryburger Muurerloosche Zur eedle Uussiicht gee, wun er 1866 dryy ufgnuu wooren isch un wun er s Amt vum Reedner ghaa het. Dr Fehrenbach isch au Voorstandsmitgliid im Fryburger Arbaiterbildigsverain un bis 1852 Mitgliid vu dr Fryburger Lääsegsellschaft gsii.

Är het au as Schriftsteller gschafft un unter anderem au Gediicht uf Alemannisch uusegee. In syre Haimet het mer en gchänt as „s Schwizerseplis Salmo“, unter däm Name het er alemannischi Gediicht uusegee. E Uuswahl us syne hoochdytsche un alemannische Gediicht isch 1842 unter em Titel Erstlinge der Dichtkunst uusechuu.

Vereffetlichunge

• Erstlinge der Dichtkunst. Förderer, Villingen im Schwarzwalde 1842.
• Robert Blum. Frankfurt am Main 1848.

Literatur

• Helge Dvorak: Biographisches Lexikon der Deutschen Burschenschaft. Band I: Politiker. Teilband 9: Nachträge. Koblenz 2021, S. 35–36. (Online-PDF)
• Frankfurter Parlament 1848/49: Biographische Umrisse der Mitglieder der deutschen konstituirenden Nationalversammlung zu Frankfurt a. M. – Nach Authentischen Quellen. Verlag Schmerber, Frankfurt a. M. 1848/49. Zweites Heft, 1849, S. 103 (Google Books).

Fueßnote

Dä Artikel basiert uff ere fräie Übersetzig vu dere Version vum Artikel „Salomon_Fehrenbach“ vu de dütsche Wikipedia. E Liste vu de Autore un Versione isch do z finde.