Saubannerzug

De Saubannerzug isch en Zug vo Freischärler us de Kantön Uri und Schwyz gsi, wo im Februar 1477 schtattgfunde het.

De Saubannerzug vo 1477 vor de Schtadt Bärn.

Vorgschicht

Urner und Schwyzer Chriegslüt sind noch de Schlacht bi Nancy mit de Verteilig vo de Büte nöd zfrie gsi. D Schtadt Gänf het zwei Johr vorher e Brandschatzsumme vo 24'000 Gulde verschproche gahn, wo no nöd zahlt gsi isch. Di Innerschwiizer hei sich wäge dem zu de Gsellschaft vom torechte Läbe zämegschlosse und hei welle uf Gänf ziie, wo si irs Gäld hei welle go hole.

De Saubannerzug

Am 21. Februar 1477 isch di Freischar us de Innerschwiiz loszoge. Es sin öppe 700 Maa gsi, wo sich über Lozärn und Bärn uf de Wäg Richtig Gänf hei gmacht. Es hei sich noch witeri Manner, bsunders vo Unterwalde und Zug, de Freischärler aagschlosse, bis öppe 1'700 bis 2'000 Chriegslüt si unterwägs gsi. De Röt vo Züri, Bärn und Lozärn het der Zug gar nöd passt. Si sind grad in Verhandlige mit Frankriich und Savoye gsi und hei nöd welle de Iidruck vermittle, si heige ihri Soldate nöd unter Kontrolle. Doderwäge sind us de Ört vo de Eidgnosseschaft, aber au us Gänf, Basel und Stroosburj Gsandti zu de Freischärler gschickt worde, wo-n-es glungen isch, de Zug am 4. März zwüsche Payerne und Lausanne z stoppe. Bi de folgende Verhandlige het sich Gänf müesse bereit erkläre, vo de 24'000 Gulde, wo si an Schulde hei kaa, 8'000 sofort z zahle. Di fäälende 16'000 Gulde het d Schtadt mit Geisle müesse absichere. Jede Teilnehmer vom Freischärlerzug het en Umtrunk und 2 Gulde übercho. Au d Gsandtschafte het Gänf müesse zahle.

Folge

Us Angscht vor setige Freischarzüg hei Gänf, Bärn und Friburg s erschti Burgrächt gschlosse, um sich dervor z schütze. Dodergäge hei d Landört proteschtiirt und de Konflikt zwüsche Schtadt- und Landört isch mit em Stanser Verkommnis biiglegt worde.

De Name

Uf em Banner vo de Freischärler isch en Eber mit eme Kolbe abbildet gsi. De Kolbe isch es Symbol für de Ufschtand gsi, de Eber isch für Muet und Chraft gschtande. D Bärner Regiirig het aber versuecht de Zug lächerlich z mache und scho e paar Johr schpöter het de Bärner Rotsherr Diebold Schilling de Freischärlerzug Zug vom Törichte Läbe gnennt. Im 17. Johrhundert isch us em Eber dann e Sau worde. In de Bärner Chronik vom Michael Stettler taucht de Begriff Saubannerzug s erschti Mol uf.

Weblink

• Thomas Schibler: Saubannerzug. In: Historisches Lexikon vo dr Schwiiz.