Sixtus II.

Dr Sixtus II. († 6. August 258) (Xystus) isch vum 30. Augschte 257 bis zum 6. Augschte 258 Bischof vu Rom gsii. Sy Name maint: S(e)xtus = dr Segst (latiin.) bzw. (do wahrschyns) Xystus = dr Glättet (griech.).

Raffael: «Sixtinischi Madonna» (1512/13), dr Sixtus II. isch links dargstellt

Är het em Stryt mit dr afrikanischen un eschtlige Gmaine iber d Daifi vu reiige Häretiker en Änd gmacht, wu sy Vorgänger Stephan gfiert ghaa het. Wie alli frieje Bischef isch er speter in d Abfolg vu dr Päpscht yygornet wore, drotz ass dää Titel zue syre Zyt nonig gfiert woren isch. Är isch dr erscht Papscht, wu dr nämlig Name wie ne friejere gfiert het.

D Nummerierig vum Papschtname as Sixtus II. isch spot chuu. Vermuetli het er, no dr griechische Iberliferig, Xystus ghaiße. Ä isch as Märtyrer unter em Chaiser Valerian gstorbe. Bim Gottesdienscht uf em Coemeterium vum Kallistus isch er iberfalle un zäme mit vier Diakon hiigrichtet wore. Drotz ass er vu allne frieje Märtyrerpäpscht di hegschte Verehrig gnosse het, isch doch dr dr noch em gmarteret Archidiakon Laurentius mee in s Bewusstsyy vum Chrischtedum yygangen isch. S Lääben un Wirke vu dr beede het in dr Capella vum Nikolaus V. im Vatikan sy hegschte chinschtlerische Uusdruck gfunde, derwylscht dr Raffael dr Sixtus uf em Gmälde vu dr Sixtinische Madonna uustärbli gmacht het.

Sy (nit botene) Mahndag in dr kadolischen Chilche isch dr 7. Augschte, in dr Orthodoxy isch s dr 10. Augschte. Im oberbayrische Pollenfeld het s bis ins 19. Johrhundert ihm z Ehren au Wallfahrte gee. In dr dertige Bfaarchilche St. Sixtus het s e Reliquie vum Unterarmchnoche.

Dr Sixtus giltet as Patron fir s guet Drieje vu dr Dribel, an sym Mahndag am 7. Augschte finde Dribelweie statt. Derzue isch er Patron fir s Drieje vu dr Bohne, fir di schwangere Fraue un bi Hals-, Rugge- un Ländeweh. Sy Attribut sin: Gäldbytel oder Gäldstuck, vylmol wird er zäme mit em Laurentius dargstellt.

Literatur

• Erich Kettenhofen: Sixtus II. In: Biographisch-Bibliographisches Kirchenlexikon (BBKL). Band 10, Herzberg 1995, ISBN 3-88309-062-X, Sp. 578–582.
• Michael Ott: Pope St. Sixtus II. In: Catholic Encyclopedia, Robert Appleton Company, New York 1913 (änglisch)

Weblink

 Commons: Sixtus II. – Sammlig vo Multimediadateie

• Sixtus II. im Ökumenische Heiligenlexikon
• Gsamtwärch vu Migne Patrologia Latina mit Inhaltsverzaichnis

Vorgänger Stephan I.

Bischof vu Rom Dr Titel Papscht isch anne 384 zum erschte Mol brucht wore. 257–258

Nochfolger Dionysius

Dä Artikel basiert uff ere fräie Übersetzig vu dere Version vum Artikel „Sixtus_II.“ vu de dütsche Wikipedia. E Liste vu de Autore un Versione isch do z finde.