Stephan I. (Bischof vu Rom)

Dr Stephan I. († 2. Augschte 257) isch vum 12. Mai 254 bis zue sym Dod Bischof vu Rom gsii. Är isch us em remische Julier-Gschlächt chuu. Sy Name stammt us em Griechisch un maint „där mit em Chranz“.

Lääbe un Wirke

Johann von Schraudolph, Speyerer Dom: Gebet des Hl. Papstes Stephan I.

Flucht vum hailige Papscht Stephanus I vum Altar vum Mars. Chupferstich vum Joh. Mathias Werlin no I.W. Baumgartner, um 1760.

D Amtszyt vum Stephan isch e relativi Friideszyt fir d Chilche gsii, zwische dr Verfolgige unter em Decius un em Valerian. Dr Stephan isch vor em aigetlige Uusbruch vu dr valerianische Verfolgig gstorbe. Ass er dr Märtyrerdod glitte het, isch e Legänd; im remische Kaländer vu 354 wird er im Verzaichnis vu dr verstorbene Bischef gnännt un nit im Verzaichnis vu dr Märtyrer.

Dr Stephan het si im sognäänte Chetzerdaifstryt mit em Cyprian vu Karthago un em Firmilian vu Caesarea verstritte. Im Gegesatz zue däne, wu vu eberem.wu vun eme Häretiker daift woren isch, e neii Daifi verlangt hän, het dr Stephan d Widerdaifi abglähnt. Au dr Dionysius vu Alexandria het do die Haltig verdrätte. Dur sy hertig Haltig däre Frog het dr Stephan fascht e Bruch mit dr Chilche z Afriak un im Oschte riskiert. Erscht no sym Dod isch dr Stryt vu sym Boofolger Sixtus II. byglait wore. Langfrischtig het si in dr kadolische Chilche aber d Position vum Stephan duregsetzt.

Wu no dr decische Verfolgig d Frog akut woren isch, wie mer mit dr Chrischte umgoht, wu in dr Zyt vu dr Verfolgig dr haidnische Getter gopferet ghaa hän (lapsi), het dr Stephan e Haltgverdrätte, wu sällene entgegechuu isch. Är het si au derfir yygsetzt, ass d Bischef vu León un vu Astorga wider yygsetzt wäre, wu wäge Uuglaube in dr Zyt vu dr Verfolgige uugstoße wore sin, wu s aber speter greit het. Des het dr Stephan in scharfe Gegesatz zur dr Verdrätter vu rigoristische Positione brocht, vor allem zum Novatian. Im Chetzerdaifstryt un au in dr Frog vu dr Bueßdisziplin het dr Stephan mit Noodruck uf em Vorrang vum remische Bischof bstande un ass di remische Tradizione vorbildi seie. Är isch e mächtige Verfächter vu dr Unuflesligkait vu dr Eh un Erfinder vum Verlobigsring gsii, wu vum chimftige Mann dr chimftige Frau gschänkt wird zum s gegesytig Dreji-Verspräche sterker z mache.

Legände

D Legänd vu sym Märtyrerdod wird in dr Legenda aurea verzellt: Dr Papscht Stephanus soll vu dr Soldate vum remische Chaiser Valerian gfange gnuu un in Tämpel vum Gott Mars brocht wore syy. Statt em Mars opfere heb er zue Gott bättet, ass dääne Zaiche git gege dr haidnisch Glaube vu d Remer. D Statue vum Mars un dr Tämpel sei druf vun eme Bltiz gschlisse wore. Dr Papscht Stephanus sei zue dr Katakombe gflichtet, wu di hailig Lucia gruet heb. Wu ne d Häscher vu Chaiser dert gfunde hebe, heb er grad d Mäss vor em Altar gläse. Di remische Soldate hebe ne an däm Ort gchepft.

Verehrig

Sy Mahndag isch dr 2. Augschte. Bygsetzt isch er in dr Calixtus-Katakombe, d Reliquie vu sym Haupt wird im Dom z Speyer verehrt.

Literatur

Ernst Pulsfort: Stephan I. In: Biographisch-Bibliographisches Kirchenlexikon (BBKL). Band 10, Herzberg 1995, ISBN 3-88309-062-X, Sp. 1350–1351.
Ytrag in d Catholic Encyclopedia, Robert Appleton Company, New York 1913 (änglisch)

Weblink

Commons: Stephan I. – Sammlig vo Multimediadateie

Vorgänger
Lucius I.

Bischof vu Rom
Dr Titel Papscht isch anne 384 zum erschte Mol brucht wore.
254–257

Nochfolger
Sixtus II.

Dä Artikel basiert uff ere fräie Übersetzig vu dere Version vum Artikel „Stephan_I._(Bischof_von_Rom)“ vu de dütsche Wikipedia. E Liste vu de Autore un Versione isch do z finde.