Peeter und Paul

Sankt Peeter und Paul isch e katoleschi Pfarrchile z Züri.

Peeter und Paul

s Chileschiff

Es isch di eerscht Chile, wo d Katolike z Züri sid dr Refermazioon ganz nöi hend töörfe poue. Wo im Kultuurkampf d Meerhäit vo de Zürcher Katolike chrischtkatolisch woorden isch, hend sech die Katolike i dr Stadt, wo röömisch-katolisch plibe sind, früsch müessen organisiere.

I dr Noochbergmäind Ussersyl (sid 1893 en Stadtdeil vo Züri) het dr Poumäischter Rudolf Gottlieb Gull (1832–1911), wo spööter z Züri au s Landesmuseeum gmacht het, ane 1874 d Chile im nöigootische Stiil pout, wo sid dr Yweijig ane 1885 s Patrozinium Peeter und Paul het.

Erscht 1895 isch dr Chileturm, wo au neugootisch isch, dranane gstellt worde. Er isch sächzg Meeter höch und im Kwartier zimli imposant gsi, bis dän, wo ganz naach näbe de Chilemuure d Weerd-Hochhüüser vo de UBS pout worde sind; hüt isch da drin e Deil vo dr Stadtverwaltig. Dr Chiledurm isch es Wärch vo de Architekte Alfred Chiodera (1850–1916) und Theophil Tschudy (1847–1911); die hend z Züri de no anderi bekannti Geböid zäichnet, öpe d Sinagooge, d Villa Patumbah und s Schauspiilhuus.

Wo gly drufabe au di refermiert Chilegmäind vo Ussersyl e nöji Chile pruucht het, isch s ere wichtig gsi, ass ire Turm na hööcher wird weder dää vo de Katolike: Dr Sankt Jakobs-Chileturm vo Ussersyl am Stauffacher, nume grad 200 Meter vo Peeter und Paul ewägg, het drum e Hööchi vo 80 Meter überchoo.

1980 isch di neugootisch Chile Sankt Peeter und Paul under Bundesschutz gstellt woorde.

Hüt isch näbedra au no s Altershäim St. Peeter und Paul.

Literatur

• Guido Kolb: 100 Jahre St. Peter und Paul. Züri 1974.
• Hans Jörg Rieger, Walter Rieger: Kath. Kirche St. Peter und Paul Zürich-Aussersihl. Bärn 1982, ISBN 3-85782-305-4.

Weblink

 Commons: St. Peeter und Paul – Sammlig vo Multimediadateie

• Website vo dr Pfarrei St. Peeter und Paul

47.3721568.527699