Riemlig

Riemlig (Telestes souffia)

Systematik

Überordnig:	Ostariophysi
Ordnig:	Charpfenartigi (Cypriniformes)
Familie:	Charpfefisch (Cyprinidae)
Underfamilie:	Leuciscinae
Gattig:	Telestes
Art:	Riemlig

Wüsseschaftlige Name

Telestes souffia

Risso, 1826

De Riemlig oder Ryslig (Telestes souffia oder au Leuciscus souffia agassii; alemanischi Näme) isch e Süesswasserfisch wo rund um d Alpe haimisch isch, aber starch gföördet isch.

Uussie

De Riemlig isch e längliche silbrige Fisch mit ere dunklere Obersiite und graue Flosse, uf de Siite het er e dunkle Straiffe. Er werd 10 bis 15 cm lang.

Verbraitig

De Riemlig isch im Iizugspiet vom Rotte, em obere Rhii und de obere Donau haimisch, aso vo Frankriich öber d Schwiiz und Tütschland, Ööstriich, Slowenie bis uf Kroatie. De Ryslig mag klaari Flüss mit ere määssige Ströömig und eme chiisige Grund. Er cha au i Seeje bis 700 müM vorchoo. Möglicherwiis isch de Ryslig vom Iizugspiet vom Rhii und vo de Donau en Underart und werd drumm au Telestes souffia agassii gnennt. A de Alpesüüdsiite, z Italie und im Tessin isch degege de nööch verwandti Strigione (Telestes muticellus) haimisch.

Lebeswiis

De Riemlig, wo i de Laichzitt und im Summer starchi Ströömig mag, zücht sich im Winter a tüüffi Stele zrugg, wo nu e fiini Ströömig hend. Er fresst Wirbelloosi und Alge. D Laichziit goot vom Märze bis in Mai, wenn d Wassertemperatur öber 12 Grad stiigt. S Wiibli lait 1'500 bis 6'200 Aier a Stele mitere starche Ströömig und eme chiisige Grund.

Büecher

Maurice Kottelat: European Freshwater Fishes; Cornol 2007. ISBN 978-2-8399-0298-4
Steinbachs Naturführer: Süßwasserfische. Ulmer, Stuttgart 2003, ISBN 3-80014-296-1

Weblink

Strömer (Fisch) uf Fishbase.org (englisch)

Telestes souffia in dr Rote Lischt vu dr gfehrdete Arten vu dr IUCN 2012.2. Yygstellt vu: Freyhof, J.,Kottelat, M., 2008. Abgruefe am 09.04.2013