Theresa Dold

D Theresa Dold ( * 1983) isch e dytschi Liedermacheri. Si schrybt und singt Lieder uf Dytsch, Änglisch un au uf Alemannisch.

d Theresa Dold, 2019

Lääbe

Si isch e Dochter vu dr Schwarzwälder Liedermacheri Roswita Dold un em Alfred Dold, eme Imker un Holzschnitzer.

Ufwagse isch d Theresa Dold z Stääge im Schwarzwald. Di erschte Akkord uf dr Gitarre het ere d Mueter bybrocht, wu si zeh Johr alt gsii isch. Scho in ire Juged het d Theresa Dold aafange sälber Lieder schrybe un het Stroßemusik gmacht un isch uf Jugedfeschtival ufdrätte.

No dr Schuel het si 2005 z Hamburg an dr Hochschuel fir Musik & Theater dr Kontaktstudiegang fir Popularmusik gmacht un nocherdani drei Johr lang Popmusik an dr Hamburg School of Music studiert. In däne Johr het si scho verschideni Engaschmänt un Ufdritt as Solischti, im Duo, im Trio un mit dr Theresa Dold Band ghaa.

Si het verschideni Bryys un Uuszaichnige gwunne. Scho 2004 isch si bis ins Halbfinal vum Dytsche Rock & Pop Bryys chuu. Anne 2005 het si mit aigene Lieder dr erscht Bryys bim „SongLive“ Kreativ-Wettbewärb vu dr Sängerakademie Hamburg gwunne. 2008 isch si as „Elexir Strings-Künstlerin“ uuszaichnet wore. Si het au as Sänger un Täxteri bim Liederoobe „Cafe Amazonien“ vum Franz Wittenbrink mitgmacht.

Anne 2008 het si ire Debüt-Album „Irgendwo dazwischen“ vereffertligt, wu si Lieder iber s Lääbesgfiel vum „Derzwische-Syy“ un vu dr innere un ussere Haimelosigkait druf gsunge het. Scho uf däm Album het si mit „Regeinsel“ e Lied uf Alemannisch vereffetligt.

Im Summer 2009 isch s vu Hamburg uus 1200 Kilometer dur Dytschland bis in iri alt Haimet im Schwarzwald gwanderet, mit eme Ruggsack un ere Gitarre. Im Johr druf isch si vum Schwarzwald uus wyter gwanderet iber d Schwyzer Alpe bis in s Tessiner Bärgdorf Montagnola, wu dr Hermann Hesse, aini vu ire greschte chinschtlerische Inschpirazione, langi Johr gläbt ghaa het. Ire Erläbnis un Yydrick vu däre Wanderzyt het si in Lieder verschafft un e Liveprogramm us Lieder un ere Diashow drus entwickelt, wu si unter em Titel „Unterwegs daheim - Zu Fuß durch Deutschland“ (2009-2012) bzw. as „Sehnsucht Süden - Zu Fuß über die Alpen nach Montagnola“ (2013-2014) ufgfiert het. 2011/2012 het si iber iri Wanderig dur Dytschland au s Audio-Raisedagbuech „Unterwegs daheim“ vereffetligt mit aigene Täxt un Lieder un im Mai 2012 het si d Lieder vu däm Heerbuech as Soundtrack-Album „Unterwegs daheim - Soundtrack zur Reise“ vereffetligt.

2015/2016 het d Theresa Dold zäme mit em Gitarrischt un Produzänt Uli Kringler d Lieder fir ire dritt Studio-Album „Strandgut - Zwischen Ebbe & Flut“ ufgnuu, wu im Spotjohr 2016 uusechuu isch.

D Dold isch Mueter vun ere Dochter un eme Suhn. Syt 2018 läbt si mit ire Familie wider z Stääge im Schwarzwald.

Anne 2024 het si bim neie Landesbryys fir Dialäkt, wu s Land Bade-Wirttebärg zäme mit em Dachverband der Dialekte Baden-Württemberg uusgschriibe het, in dr Kategory Literatur mit em Gedicht Drachewolkeritt en Ferderbryys gwunne.

Vereffetlichunge

• Irgendwo dazwischen. CD 2008
• Unterwegs daheim - Zu Fuß durch Deutschland. Reisetagebuch mit Musik. 2011 (Heerbuech)
• Unterwegs daheim - Zu Fuß durch Deutschland. Soundtrack zur Reise. CD 2012
• Strandgut - Zwischen Ebbe & Flut. CD 2016

Weblink

•  Commons: Theresa Dold – Sammlig vo Multimediadateie
• Websyte vu dr Theresa Dold
• d Theresa Dold uf soundcloud.com
• d Theresa Dold uf youtube.com
• Erich Krieger: Liedermacherin Theresa Dold feierte beim Konzert in Buchenbach ein Heimspiel, Badische Zeitung, 20. Merz 2019
• Sarah Nöltner: Vom Reisen, Aufbrechen und Ankommen, Badische Zeitung, 22. Merz 2017
• Monika Rombach: Zu Fuß durch ganz Deutschland, Badische Zeitung, 4. Februar 2010
• Laura-Carmen Schmid: 1200 Kilometer zu Fuß nach Hause, Badische Zeitung, 17. Merz 2011
• Sidney-Marie Schiefer: Wie eine Sängerin das Leben auf einem Berghaus in Stegen erlebt, Badische Zeitung, 14. Septämber 2023
• Peter Disch: Was Dialektpreis-Trägerin Theresa Dold aus Stegen an der Auszeichnung des Landes schätzt, Badische Zeitung, 11. Novämber 2024