Thrasymedes

De Thrasymedes (altgriech. Θρασυμήδης) isch i de griechische Mythologie e Held gsii, wo im Toianische Chrieg mitgmacht hett und ann vo dene gsii isch, wo im Troianische Ross ghogget isch.

De Thrasymedes isch e Soo vom Nestor gsii. Sini Muetter isch nochem Homer d Eurydike, nochem Apollodor aber d Anaxibia. De Thrasymedes isch zäme mit sim Vatter Nestor und siim Brüdere Antilochos in Troianische Chrieg zoge und hett sich as guete Chämpfer uuszaichnet. Er hett o zo dene ghört, wo sich im Troianische Ross versteggt hend. Nochem Chrieg isch er zäme mitem Nestor zrugg uf Pylos choo, de Antilochos aber isch im Chrieg umchoo und vor Troia bistattet wore.

Wo de Pausanias im 2. Joorhundert n. Chr. Messenie bsuecht hett, hend em d Lütt bim Vorpirg Koryphasion s Graab vom Thrasymedes zaiget. Noch de Bischriibig vo sinnere Laag, dörst da identisch gsii si mitem mykenische Chuppelgraab, wo nördlich vo de Bucht Bouphras, stoot.

De Thrasymedes isch de Vatter vom Sillos und Groossvatter vom Alkmaion, wo as de Stammvatter vo de Alkmaionide z Athen ggulte hett.

Literatur

• Ludwig Ruhl: Thrasymedes 1. In: Wilhelm Heinrich Roscher (Hrsg.): Ausführliches Lexikon der griechischen und römischen Mythologie. Band 5, Leipzig 1924, Sp. 865 f. (Digitalisat).
• Silke Antoni: Thrasymedes. In: Der Neue Pauly (DNP). Band 12/1, Metzler, Stuttgart 2002, ISBN 3-476-01482-7, Sp. 499.