Ursina Greuel

D Ursina Greuel (* 3. Oktoober 1971 z Göttingen) isch e Schwyzer Theaterreschiseeri un -produzänti.

Lääbe

D Ursina Greuel isch z Götten uf d Wält chuu as fimf Chind vum dytsche Matemaatiker Gert-Martin Greuel un dr schwyzeriche Chrankeschweschter Ursula Greuel. Anne 1991 het si z Kaiserslautern uf em Albert-Schweitzer-Gimnasium Abituur gmacht. Vu 1991 bis 1993 het si an dr Humboldt-Uniwersiteet z Berlin Theaterwisseschaft un Hispanischtik studiert. Derno het si vu 1993 bis 1996 an dr Schauspiil-Akademy Züri studiert. In däne Joor het si am Maxim Gorki Theater Berlin (bim B.K. Tragelehn) un am Thalia Theater Hamburg (bi dr Katharina Thalbach) e Reschyhospitanz gmacht.

Noch ere Gaschtassischtänz am Schauspiilhuus Züri bim Werner Düggelin het si vu 1997 bis 1999 zeerscht as Reschyassischtänti, druf as Gaschtreschiseeri am Thalia Theater Hamburg gschafft. Syterhäär schafft si as freii Reschiseeri.

Dr Schwäärpunkt vu ire Aarbet setzt d Greuel vor allem uf zytgnessischi Dramaatik un Spoken Word. Anne 1999 het si d Autoreraie „Antischublade“ im Ruum 33 Baasel grindet un bis 2004 zäme mit em Autoor Lukas Holliger glaitet. Im Joor 2002 het si d Gruppe Matterhorn Produktionen grindet, wu syterhäär Schwyzer Biinechunscht zaigt (u. a. Die Fondueoper vum G. Krneta un Nach Lampedusa – Wandererfantasien). Vu 2004 bis 2008 isch si Co-Lauiteri vu dr Wäärchstattraie fir Neii Dramaatik (ab 2006 primadrama) am Voorstadtthetarer Baasel gsii.

2009/2010 het si ne Master in „Scenic Arts Practice“ an dr Hochschuel vu dr Chinscht Bärn gmacht.

Anne 2015 het d Greuel s Brojäkt STÜCKBOX z Dornech aagfange. D Idee dooderhinter isch, zytgnessischi un bishäär nit vereffetligti Täxt mit ere chuurze Broobzyt un eso weenig Biinebild wie meegli z zaige. Dr Täxt, s gsproche Woort un s Spiil steen im Voordergrund.

Nääbe ire Aarbet as Reschiseeri isch d Greuel vu 2000 bis 2005 Kuratoori fir d Schwyz bim internazionaale Jungdramaatikerdräffe INTERPLAY gsii, het vu 2006 bis 2015 dr Beruefsverband vu dr Freie Theaterschaffende vu dr Schwyz (ACT) bresidiert, het 2013 s Baasler Kultuurbartlemänt ufböue un koordiniert un laitet syt Augschte 2018 s sogar theater z Züri. In dr Programmzeitung Basel het si kultuurbolitischi Kolumne gschriibe un isch syt 2009 Mituusegeeberi vu dr Buechraie spoken script bim Lozärner Verlaag Der gesunde Menschenversand.

2005 het si d Jury vum Zürcher Theaterspektakel bresidiert un 2007 un au 2010 d Jury vum Zäntraalschwyzer Theatertext-Feerderigs-Bryys. 2011 isch si Mitgliid in dr Jury fir d d Wäärchbryydreeg vu dr Stadt Lozärn gsii.

D Ursina Greuel isch mit em Schriftsteller Guy Krneta ghyroote, het vier Chinder un läbt z Baasel un z Züri.

Uuszaichnige

• premio Feerderbryys fir Jungs Theater (fir s Brojäkt Antischublade)
• Kultuurbryys vum Kanton Züri (fir d Inszenierig A. ist eine andere)
• Uuszaichnig vu dr hibou-Stiftig mit em hibou 2015 (fir s Brojäkt STÜCKBOX)

Weblink

• Matterhorn Produktionen
• Vita Ursina Greuel bi Matterhorn Produktionen
• STÜCKBOX
• Ursinal Greuel uf dr Websyrt vum sogar theater Züri
• Ursinal Greuel uf tagderpoesie.ch