Dialäkt: Baseldütsch

D Vischers si en altiigsässeni Baasler Familie.

D Familie stammt ursprünglig us Lächhuuse bi Augsburg. Dr Stammvater isch dr Hans, däm si Soon Leonhard isch uf Colmar go lääbe und het dört 1554 s Bürgerrächt überchoo. E baar Generazioone spööter isch dr Matthäus as Kind uf Baasel khoo und isch 1649 Bürger worde. Si Änggel Lienard (1690–1760) isch in dr Safre-Zumft Säggser gsi und dr erst Groossroot us dr Familie.

S Vischers häi sich früe scho dur Hüroote mit e Hufe Baasler Gschlächter wie de Stäächely, Iisely, Saresy, Spiiser, Buurged und Vonder Mühll verbandlet.

Im Lienerd si Soon, wo au Lienard (1722–78) ghäisse het, het zwäi Söön ghaa, wo Stammväter vo nöije Linie worde si: dr Johann Jakob (1750–1825), wo die elteri Linie von em abgstammt het und dr Peter, Gründer vo dr jüngere Linie. Dr Johann Jakob het 1786 dr Hoochefirstehoof an dr Riddergass und dä isch no am Aafang vom 21. Joorhundert in de Händ vo dr Familie gsi, wo wäge däm dr Zuenaame «Hinder em Münster» überchoo het. Im Peter (1751–1823) si Linie isch äins vo de Baasler Rootsgschlächter worde und är und sini Brüeder häi e Hufe Böste in dr Stadt iignoo. Wil si vo 1802 aa im Riichesteinerhoof, em Blaue Huus, gläbt häi, isch «Blaus Huus» iire Zuenaame worde. Dr Peter Vischer het au die sarasinschi Siidefabrik, wo im Blaue Huus dehäi gsi isch, witergfüert.

Wääred die jüngeri Linie weenig Mitgliider gha het und e Däil von ene im 20. Joorhundert usgwanderet si, het dr eleteri Zwiig langi Zit d Baasler Politik und Gsellschaft mitbrägt. Zu dene häi im Johann Jakob sini Söön Benedikt (1779–1856) und Wilhelm (1789–1849) ghöört. Im Wilhelm sini Noochfaare häi s Handelshuus vo dr Familie in de Wirtschaftsgeböid vom Hoochefirstehoof bis 1905 witergfüert. Under de Noochkomme vom Benedikt het s e Hufe Brofässer an dr Uniwersidäät Baasel gee, z. B. dr Filoloog Wilhelm Vischer (1808–1874) und däm si Soon, dr Historiker Wilhelm Vischer (1833–1886). Däm si Brueder Eduard (1843–1929) het en Archidekturbüro gründet, wo hüte no existiert. D Siidebandfabrikzioon isch bis in d Middi vom 20. Joorhundert witergfüert worde, zletscht am Claragraabe.

In dr Familie si e Hufe Akademiker worde, vor allem Rächtsaawält, Archidekte, aber au Pfäärer. Bekannti Vischer im 20. Joorhundert si dr Ueli Vischer (* 1951), wo vo 1992 bis 2005 Regierigsroot vom Kanton Baasel-Stadt gsi isch, und dr Daniel Vischer (1950–2017), wo vo 1983 bis 2003 Zürcher Kantonsroot gsi isch und 2003 in Nazionalroot gweelt worde isch.

Sit 1938 existiert e Familiestifdig.

Kwelle ändere

Weblingg ändere