Wikipedia:Treffen der Wikipedianer/Herbsttreffen 2010/Protokoll

Termin: Samstig, 9. bis Sunntig, 10. Oktober 2010

Mr hänn uns am 9. un 10. Oktober z St. Galle droffe. Do gsi sin de al-Qamar, de Terfili, de Holder un de Strommops.

Finanzierig vum Wikiheftli

D'Muettersproch-Gsellschaft hät e Bedeiligung am Wikiheftli chlar abglähnt. Mr wän bi witere Verein, wu sich für de Dialäkt iisetze (Verein für Schwizerdütsch, OLCA), aafroge, ob sì odder ihri Mitglider (privat) Interässi hätte. Evtl. mache mr au moll e eigene Spändeuffrüef (mr mießte in dem Fall allerdings genau bschriibe, für was d'Lüt spände un was mr mache dete, wenn nit gnüeg Gäld zämmechunnt un mer s Wikiheftli nit chönne drucke).

Bis zu de nechste Versammlig vum Schwizer Wikimedia-Verein (wohrschints Merz 2010) sotte mr e genaus Konzäpt ha, wie mr d'Heftli dien unter d'Lüt bringe. Vorschleg sin:

Veraastaltige rund um de Dialäkt (wenn z. B. öbber unseri Wikipedia vorstellt odder we'mr e eigene Stand uffmache chönne)
Universitete (uslege zum Mitneh, chönnt gradd für Germanistik-Studänte interessant sii)
Biecheräie (in de Bstand uffneh; wichtig wär, dass es numme vu denne Lüt mitgnuu wird, wu's au wirkli läse un's nit glii zum Altbapier dien)

Hilfsite un bsunders Ersti Schritt

Sälli Site, s Tutorial un d'Tour sin viil z detailliert un nit für Neuling geignet. Es wär besser, mr dete zwei Fassige mache: eini, wu numme s Allerwichtigst dinnestoht (wie lëgt mer e Site aa, no gar nütt zur Formatierig) un eini, wu e bitz detaillierter isch (eifachi Formatierige, für Fortgschritteni). Di jetzige Iistiigersite sin viil z lang un z kompliziert, si ermüetige Neuling nit zum Schriibe. De Terfili schribt e Neufassig vu de Erste Schritt. Sälli soll de Läser meh motiviere, bi uns mitzmache, un em zeige, dass es nit schwär isch aazfange; ußerdem wä'mr d'Site persönliger gstalte un de Läser übberall diräkt un mit "duu" aaspräche.

Au di andere Hilfsite sotte emoll usgmistet were, wiil viili devuu doppelt, veraltet odder nit nötig sin.

MediaWiki:Newarticletext/ un Bearbeitigs-Oberflächi

D'Systemmäldig, wu bim Aalege vu-n-ere neue Site erschiint, hä'mr während em Träffe verbessert. Folgendi Änderige hät's gee:

De Iileitigssatz (Es gitt no kei Site mit em Namme ...) isch nit nötig; mr hänn en uusegnuu.
De Hiiwiis uff d'Hilfsite hä'mr umformuliert. Bishär hät er wie-n-e Ermahnig dönt, bloß nütt falsch z mache, er soll meh als Rotschlag gmeint sii für die, wu sich uusicher fiehle. Us em gliiche Grund isch de Verwiis uff de Sandchaste entfernt wore. Neui Nutzer solle nit abgschräckt, sundern motiviert were!
Au s Iifiege vum Interwiki-Link isch nit so wichtig; mr hänn de entsprächend Hiiwiis glöscht.
De änglisch Tekscht isch übberflüssig, wiil sälte Nit-Müetersprochler bi uns schriibe un en di meiste sowiso nit beachte.

Uff de dütsche Wikipedia hät's bim Ändere unter em Lizänztekscht e nützligi Liiste, wu s Iifiege vu Sunderzeiche viil eifacher macht. Mr dete sälli gärn in di alemannischi Wikipedia übberneh un si an unseri Bedürfniss aabasse (Dieth-Zeiche).

Johresbilanz zu de Hauptsite, Qualitet, Züegriffszahle

De Holder hät verschideni Statistike erstellt un ladet si demnechst uffe. Wichtigschti Pünkt sin gsi, dass bi de Aazaal vo Bearbeitige un neui Artikel in däm Joor en Rekord uffgstellt worde isch, aber dass d Aazaal vo de Lüt, wo die Bearbeitige mache, chlyner worde isch. Es chömme chuum mee neui Lüt zue üs, oder si blybe nit lang.

Mer hen e chly über d Gründ spekuliert:

De Reiz vo de Wikipedia ingsamt isch hüt nümmi so gross, wyl es Wikipedia scho lang git.
D Qualität vo de alemannischi Wikipedia isch gstige. Mer muess also mee Wüsse un Chönne mitbringe zume bi üs aafange.

Es isch vorgschlo worde, bi Neuling au emool en Aug zuezdrugge, wenn mer gseet dass si Potenzial hen.

Projäkt "Internetheftli"

De Holder hät des Projäkt vu de Muettersproch-Gsellschaft vorgstellt. S übernechst Heftli vom "Alemannisch dunkt üs guet" (chunnt im Juni uuse) soll s Thema "Alemannisch im Internet" haa. Unseri Idee isch, dass jede, wu wott, e Kapitel (1-2 Site) zu'me-ne bstimmte Thema cha schribe. Zit dodezue isch bis Endi März. Ei Kapiteli wird natürli di alemannischi Wikipedia vorstelle. Des Themeheft soll nit unter ere freie Lizenz veröffentlicht were, d. h. d Kapitel sotte wege dem au nit in dr Wikipedia gschribe were.

Wel d Muettersproch-Gsellschaft ihre Schwerpunkt z Südbade het, solle die Kapitel vor allem südbadischs Alemannisch im Internet bhandle. Uusblick uf d Situation vom Schwyzerdütsch, Elsässisch, Vorarlbergisch oder Schwäbisch sin aber uusdrücklich erwünscht.

E Sammlig vu Ideä un Aaregige het s doo.

Fair use

Mr hänn scho diversi Bilder, wu unter derre Lizänz stönn. Wichtig isch, dass d'Ufflösig vu sonige Bilder nit allzüe hoch isch un si i'me-ne Zämmehang bruucht were, wu s Thema illustriert. Dass de Uurheber sich beschwärt, isch unwohrschinlig, sott's einewäg e Reklamation gee, müeß e Bild glii glöscht were. E Richtlinie übber Fair use bi de als.wp wird no gschribe.

Neui Charte

Mr dien d'Charte vu de alemannische Dialäkt no moll übberarbeite; si wird in Chürzi vum Strommops uffeglade. Änderige sin vor allem:

Weniger Nämme (bedrifft vor allem Ört, wu ußerhalb vum alemannische Gebiet lige, främdsprochigi Nämme, Gwässer- un Landschaftsbezeichnige)
Sprochligi Korrektuure (Dialäktnämme stimme nò nit übberall; Legände müeß e bitz übberarbeitet were)
Gränze (mr hänn d'Gränze zwüsche Schwöbisch un Nordoberdütsch bim Dräffe übberarbeitet; evtl. mien d'Gränze vum Höchstalemannisch no korrigiert were)

D'Charte commons:File:Lingue grigioni completo.png wird uff Alemannisch übbersetzt un e bitz korrigiert.

Portäler

S Portal Schwiz gfallt uns güet; s Elsass isch no e bitz luckehaft. Übber Liechtestei un Vorarlbärg hä'mr no z wenig Artikel für e Portal. Wichtig isch, dass uff de Hauptsite prominänter uff d'Portäler hiigwise wird (z. B. durch Bilder).

Nationalitets-Kategoriie

Wiil's nit scho immer Nationalstaate gee hät, chönne viili hisdorischi Persone schlächt in e Kategorii "Dütsche", "Östriicher" etc. iigordnet were. In eso Fäll sott mer wenn's goht eini vu de Unterkategoriie vu "Gschichtligi Person" verwände. Au bi Persone, wu in jüngerer Zit gläbbt hänn, cha mer nit allewiil ei Kategorii bstimme (z. B. hät de Albert Einstein in de Schwiz, z Dütschland un in de USA gläbbt), Artikel mien mänkmoll mehrfach kategorisiert were.

Sustigs

Mr hänn Donuffnahme gmacht vu alemannische Bispilwörter (für Phonologii-Artikel) un e baar Ortsnämme. De Holder hät für di Gsprocheni Wikipedia de Artikel Hùùnibùg vorgläse un uffgnuu.
Am Sunntig si'mr in de Stiftsbibliothek gsi, hän dert dr Vocabularius St. Galli un Handschrift B vom Nibelungelied derfe bewundre.