Amt Merischwand

S Amt Merischwand isch es Amt gsi, wo zu de Freie Ämter ghört het, ere gmeine Herrschaft vo de Eidgnosse. Zum Amt Merischwand hei d Dörfer und Wiler ghört, wo hüt in de Gmeinde Mülau, Bänzischwil und Merischwand liget.

Gschicht

Site m 1293 sind die Dörfer und Wiler, wo schpöter zum Amt Merischwand si zämegfasst worde, im Bsitz vo de Herre vo Hünebärg gsi. D Bewohner vom Biet hei sich aber im 1394i vo de Hünebärger los chauft und hei sich friiwillig de Schtadt Lozärn unterschtellt, wo si zwar nöd di gliiche Rächt hei gha, wi d Schtadtbürger, aber gliichwohl me wi d Untertane vo Lozärn. Ihri Untervögt und Richter hei si sälber dürfe wääle. Au nach de Eroberig vo de Freie Ämter durch d Eidgenosse reschpektiv vom Amt Meiebärg durch d Lozärner im 1415, het an de Situation nüd gändret. Im 1426 isch dann zum erschte Mol s Amt Merischwand in ere Urkund erwäänt. Mülau, Bänzischwil, Merischwand und d Wiler und Einzelhöf sind zum Amt Merischwand zämegfasst gsi. Bsunders di hüfige Überschwemmige, wägem Hochwasser vo de Rüüs, hei em Amt z schaffe gmacht. D Bewohner hei d Verpflichtig gha, d Schutzdämm in Ordning z bhalte. Mit de Ziit hets au Probläm mit Lozärn gäh, will d Schtadt immer weniger s Gfühl het gha, sich an di alte Verträg müesse z halte. Im 1765i het sogar e Revolte gäh, wo aber schnell isch nidergschlage worde. Im März 1798 sind d Franzose in d Schwiiz iimarschiirt und hei di Helvetisch Republik usgruefe. Di drü Dörfer vom Amt Merischwand hei in dere Ziit zum Dischtirkt Hochdorf ghört. Im Oktober 1802 het sich s Amt Merischwand eigemächtig em Kanton Zug aagschlosse und im Februar 1803 het de Napoleon beschtimmt, dass s Amt em Kanton Aargau aagschlosse wird. D Ämter sind im Aargau aber durch d Gmeinde ersetzt worde, so isch s Amt Merischwand zu de Gmeind Merischwand worde. Im 1810i isch dann aber Mülau selbschtändig worde, im 1813i Bänzischwil.