Andy Rihs
Dr Andreas «Andy» Rihs (* 2. Novämber 1942 z Stuegert; † 18. April 2018 z Züri), haimatbräächtigt z Meinisbeerg, isch e Schwyzer Unternämer gsii.
Lääbe ändere
Dr Rihs het 1966 zäme mit em Beda Diethelm un sym Brueder Hans-Ueli Rihs vu sym verstorbene Vater dr Heergrääthärsteller Phonak (hite: Sonova) ibernuu un het s Unternämer as Chief Executive Officer (CEO) bis April 2000 un interimistisch vu April bis Septämber 2002 gfiert. Vu 1992 bis Merz 2011 het er dr Verwaltigsroot vu dr Phonak/Sonova Holding bresidiert. Wäge schwääre Fähler im Finanzmanagement vum Unternäme aafangs 2011 isch er im Merz 2011 as Bresidänt zruggdrätte, isch aber aifach Mitglid im Verwaltigsroot blibe. Au dr CEO Valentin Chapero un dr Chief Financial Officer (CFO) Oliver Walker sin dodmol zruggdrätte. Wel e baar Manager im Vorfäld Aktie un Optione verchuaft ghaa hän, dodrunter dr Rihs Aktien im Wärt vu 37,5 Millione Franke[1], isch e Stroofuntersuechig gege ihn un gege aacht anderi Persone vum Management ufgmacht wore wäge muetmaßligem Insiderhandel. D Staatsaawaltschaft Züri het anne 2012 alli Stroofverfahren yygstellt, wel s kai Verletzig vu dr Insiderstroofnoorm gee ghaa het[2].
D Phonak-Gruppe isch ab 2000 Sponsor vum Phonak Cycling Team gsii, wu 2006 no widerholte Dopingskandal ufglest woren isch. Anne 2009 isch dr Rihs in Raadsport retuurchuu mit em BMC Racing Team, wu vum Fahrraadhärsteller BMC unterstitzt woren isch, wu au in sym Bsitz gsii isch. Dr Rihs isch Inhaber vu verschiidene Gsellschafte gsii, vor allem im Immobilien- un Fahrraadgschäft.
Iber d Sport un Event Holding AG mit Sitz z Lozärn isch dr Rihs mit sym Brueder Bsitzer vu dr Young Boys Bärn gsii[3].
Dr Andy Rihs isch am 18. April 2018 an dr Folg vun ere Leukämy-Chranket gstoorbe.
Fueßnote ändere
- ↑ Sonova-Gründer Rihs: «Ich habe keine Fehler gemacht» In: sf.tv vum 30. Merz 2011
- ↑ Verfahren gegen Sonova-Spitze eingestellt. In: Neue Zürcher Zeitung vum 14. Jänner 2013
- ↑ Emil Bischofberger und Christian Zürcher: Ich kanns mir bis ans Ende meiner Tage leisten. Tages-Anzeiger, 16. Juli 2016, archiviert vom Original am 16. Juli 2016; abgruefen am 16. Juli 2016.
|
Dä Artikel basiert uff ere fräie Übersetzig vu dere Version vum Artikel „Andy_Rihs“ vu de dütsche Wikipedia. E Liste vu de Autore un Versione isch do z finde. |