Anna Maurizio

D Anna Maurizio (* 26. November 1900 z Lemberg; † 24. Juli 1993 z Liebifäld bi Bärn) isch e Schwyzer Biinefoorscheri gsii. Iiber drei Jorzeent het si in dr Biinenabdailig vu dr Aidgnessische Milchwiirtschaftlige un Bakterioloogische Aastalt Liebefeld gschafft. Si het dr Uusdruck „Bienenbotanik“ breegt un neii Methoode fir zum Bstimme vu Polle im Huunig entwicklt.

d Anna Maurizio in irem Huus am Rosenweg z Liebefeld ca. 1970

Familie, Uusbildig un Beruef

D Anna Maurizio isch e Doochter vum Botaaniker un Kultuurhischtooriker Adam Maurizio gsii, wu us eme alte Gschläächt us em Kanton Graubünde chuu isch. Iiri Voorfaare hän scho syt Jorzeent as „Uuslandsschwyzer“ z Poole gläbt. Si isch anne 1900 z Lemberg uf d Wält chuu. Deert isch si bis zum Abituur uf verschiideni Schuele gange. Derno het si an dr Tächnische Hoochschuel Lemberg Botaanik un Entomology studiert. 1923 het si s Stuudium as Diploom-Agraaringenieuri abgschlosse. Anne 1924 isch si in Schwyz gange un het deert an dr Uniwersiteet Bärn wyterstudiert. Si isch deert 1927 bromewiert woore mit ere Dissertazioon iber d Meeldaupilz us dr Gattig Podosphaera.

1928 het d Anna Maurizio e Stell as Wolonteeri an dr Aidgnessische Milchwiirtschaftlige un Bakterioloogische Aastalt z Liebefeld bi Bärn iiberchuu. Zeerscht het si deert iber dr Schaade am Ammitauer Chees dur Schimmelpilz gfoorscht. Ire Inträssi het aber bal dr mykoloogische Broblääm bi dr Biinehaltig gulte. No 1930 isch si as wisseschaftligi Mitarbaiteri in d Biinenabdailig vu dr Liebefelder Foorschigsaastalt gwägslet un het ab doo zue dr Chäärnbroblääm vu dr Biinekund un dr Hoonigfoorschig gschafft. 1965 isch si in Ruestand gange.

Foorschig

Bi ire mykoloogische Aarbete uf em Biet vu dr Biinekund het d Anna Maurizio zeerscht in Biinesteck verschiideni Pilzaarte untersuecht un däne iiri Lääbesbedingige in Abhängigkait vum Kliima iberbrieft. Im Mittelpunkt vu ire Foorschige isch aber d Pollenanaliis vu Huunig gstande. Si neii mikroskoopischi Untersuechigsmetoode entwicklet go mit Hilf vu dr Pollenanaliis di geograafisch Häärchumft vu Huunisoorte quantitatiiv bstimme. Langi Jorzeent het si as di wiichtigscht Experti uf em Biet vu dr Huuni-Pollenanaliis gulte. Där Nascht vu dr Biinekund, d Melissopalynology, het mit iire Foorschigsaarbete ne dytlige Gump fiirschi gnuu.

D Anna Maurizio het dr Uusdruck „Bienenbotanik“ breegt. Dodrunter het si d Bezieige zwische dr Biine un dr Bflanzewält verstande. Vor allem d Chänntnis vu Draachtbflanze, d Erneerigsfisiology vu dr Biine, Vergiftige vu dr Biine dur Bflanze un Bflanzeschutzmittel un d Bezieige zwische Biinehaltig un Buure sin Teemeberaich vu dr Biinebotaanik. Uf all dääne Biet het d Anna Maurizio gfoorscht. Uf iri Iniziatiiv isch anne 1951 im Aaschluss an de Biineziichterkungräss z Leamington Spa (Ängland) e Internazionaali Kummissioon fir Biinebotaanik grindet woore, wu si fascht zwai Jorzeent lang bresidiert het.

D Publikazioonslischt vu dr Anna Maurizio umfasst 150 Byydreeg in Fachzytschrifte un e baar Schrifte un Biecher. As ire Hauptwäärch giltet Das Trachtenpflanzenbuch, e Handbuech iber Nektaar un Polle as s wiichtigscht Fueter vu dr Huunibiine, wu si zäme mit dr Ina Grafl verfasst het. S isch zum eerschte Mool anne 1969 un druf in zwoo andere Uflaage uusechuu. Noch em Dood vu dr Anna Maurizio het d Friedgard Schaper 1994 e vierte erwytereti Uusgaab uusegee.

D Anna Maurizio gheert zue dr wiichtigschte Biinefoorscherne vum 20. Jorhundert, wu me au internazionaal gchännt het. Iri wisseschaftli Lääbeslaischtig un Sammelobjäkt us ire Foorschigsaarbet het d Dorothea Brückner, d Laiteri vu dr Foorschigstell fir Biinekund an dr Uniwersiteet Bremen, im Rame vu dr Uusstellig Darwins Schwestern voorgstellt. Die Wanderuusstellig het me aafangs 2009 im Huus vu dr Wisseschaft z Bremen chenne sää un speeter im Roemer- un Pelizaeus-Museum z Hildesheim.

Schrifte

Zur Biologie und Systematik der Pomaceen bewohnenden Podosphaeren. Diss. Univ. Bern 1927.
Beobachtungen über die Lebensdauer und den Futterverbrauch gefangen gehaltener Bienen. Beitrag zur Methodik von Fütterungsversuchen. Mit statistischer Auswertung von A. Linder. In: Schweizerische Bienen-Zeitung 1946, Beiheft; H. 13 – Bd. 2.
Pollenanalytische Untersuchungen an Honig und Pollenhöschen. In: Schweizerische Bienen-Zeitung 1949, Beiheft; H. 18 = Bd. 2.
Weitere Untersuchungen an Pollenhöschen. Beitrag zur Erfassung der Pollentrachtverhältnisse in verschiedenen Gegenden der Schweiz. In: Schweizerische Bienen-Zeitung 1953, Beiheft; H. 20 = Bd. 2.
Blüte, Nektar, Pollen, Honig. Verlag der Deutschen Bienenwirtschaft München 1960.
Werner Kloft, Anna Maurizio und Walter Kaeser: Das Waldhonigbuch. Herkunft und Eigenschaften des Waldhonigs. Ehrenwirth Verlag München 1965; 2. erg. u. erw. Aufl. unter Mitarbeit von A. Fossel unter dem Titel Waldtracht und Waldhonig in der Imkerei. Herkunft, Gewinnung und Eigenschaften des Waldhonigs. Ebd. 1985.
Anna Maurizio und Ina Grafl: Das Trachtpflanzenbuch. Nektar und Pollen – die wichtigsten Nahrungsquellen der Honigbiene. Ehrenwirth Verlag München 1969; 2. Aufl. 1980; 3. Aufl. 1982; 4. überarbeitete und wesentlich erweiterte Aufl. von Anna Maurizio und Friedgard Schaper, ebd. 1994.
Der Honig. Herkunft, Gewinnung, Eigenschaften und Untersuchung des Honigs. Erste Auflage 1927 von Enoch Zander und Albert Koch. Völlig neu bearbeitet von Anna Maurizio. Handbuch der Bienenkunde in Einzeldarstellungen, 2. Aufl., Bd. 6, Verlag Eugen Ulmer Stuttgart 1975.

Literatuur

Otto Morgenthaler: Zum Rücktritt von Dr. Anna Maurizio. In: Zeitschrift für Bienenforschung, Bd. 8 (1965/66), Heft 5, S. 130–140, (mit Schriftenverzeichnis und Bild auf S. 129).
Joachim Evenius: Dr. Maurizios Verdienste um die praktische Bienenzucht. In: Zeitschrift für Bienenforschung, Bd. 8 (1965/66), Heft 5, S. 141–142
Jean Louveaux: Das wissenschaftliche Werk von Anna Maurizio. In: Apidologie, Bd. 21 (1990), S. 397–416.
Jean Louveaux: In memoriam. Anna Maurizio (1900-1993). In: Apidologie, Bd. 24 (1993), S. 536.
Peter Fluri und Jean-Daniel Charrière: Anna Maurizio, Pionierin der Bienenbotanik, würde 100-jährig. In: Schweizerische Bienenzeitung Jg. 123 (2000), Heft 11, S. 660–661.
Irmgard Jung-Hoffmann: Frauen und andere Merkwürdigkeiten. In: Deutsches Bienen-Journal, Jg. 16 (2008), Heft 7, S. 308–309.

Weblink

Publikatione vo und über Anna Maurizio im Katalog Helveticat vo dr Schwiizerische Nationalbibliothek
Literatur vu un iber Anna Maurizio im Katalog vu dr Dütsche Nazionalbibliothek
D Uusstellig Darwins Schwestern

Dä Artikel basiert uff ere fräie Übersetzig vu dere Version vum Artikel „Anna_Maurizio“ vu de dütsche Wikipedia. E Liste vu de Autore un Versione isch do z finde.