Anton Henne

Dr Josef Anton Henne (* 22. Juli 1798 z Sargans; † 22. Nofämber 1870 z Wolfhalde) isch e Schwiizer Hischtoriker und Dichter gsi.

Dr Henne isch anne 1798, also am Afang vo dr zyt vo dr Helvetik, z Sargans als Soon vom Schnyder Josef Anton Henne und dr Friederike Stehle uf d Wält cho. Er het i dr Nöchi vo sim Heimetort im Chlooschter Pfääfers d Schuel psuecht und isch denn uf Luzärn, Fryburg im Brysgau und uf Heidelbärg go studiere. Z Fryburg isch er em Studänteverein Zofingia byträtte, und er het regelmässig a de Fäscht vo dr Helvetische Gselschaft mitgmacht.. 1826 isch er z Sanggalle Stifts- und Staatsarchivar und 1834 Lehrer für Gschicht und Geografy a dr Kantonsschuel Sanggalle worde. I dere Zyt het er agfange gschichtlechi Wärch z schrybe. Er het sech i dr Kantonspolitik angaschiert und isch Grossroot und au Verfassigsroot worde; do het er e radikali politische Haltig verträtte. Vo 1842 bis 1855 isch er z Bärn Gschichtsprofässer a dr Uni gsi und zytewys au no Lehrer am Gymnasium gsi. Mit em Jeremias Gotthelf isch er befründet gsi. Drno isch er zrugg id Oschtschwiiz, won er vo 1855 bis 1861 wider Stiftsbibliotekaar z Sanggalle gsi isch. Denn het er bis zu sim Tod als Sekretäär vom Sanggaller Erzieigsdepartemänt gschaffet.

Dr Josef Anton Henne isch als Publizischt und Schriftsteller bekant worde. Er het alti Saage gsamlet, won er 1824 zäme mit sine sälber dichtete Lieder im Buech Lieder und Sagen aus der Schweiz i dr Sangaller Mundart und deils uf Hochdütsch veröfentlecht het. Und er het Lieder dichtet, wo deils als Schwiizer Volkslieder bis hüt beliebt sind. Ganz bsunders gilt das für s Lied Luegit vo Bärgen und Tal, wo-n er anne 1823 wärend emene churze Underbruch vom Studium als Lehrer i dr Schuel vom Philipp Emanuel Fellebärg z Hofwyl bi Bärn dichtet het. Z’erscht het dr Titel vo däm Lied Abendlied der Wehrliknaben von Hofwyl gheisse. Dr Sanggaller Komponischt Ferdinand Fürchtegott Huber (1791–1863) het derzue d Melody gsetzt, und mit dere isch es über Generazioone beliebt blibe und au im spoote 20. Joorhundert vo Musiker immer wider nöi interpretiert worde. Das Gedicht isch in ere Mischig vom Sargansertieläkt mit em Bärndüütsch und es het i dr Urfassig föif Stroofe, im bekante Lied gsunge wärde meischtens nume vier dervo, und das erscht no in ere chly abgänderete Fassig.

Dr Biograaf vom Henne, dr Karl Reinacher, het gschribe, dr Sarganser Dichter ghör zu de nazionale Schriftsteller vo dr Schwiiz.

Wärch (Uswahl)

• Lieder und Sagen aus der Schweiz, 1824, 2. Uflag 1827
• Diviko und das Wunderhorn oder die Lemanschlacht. Ein deutsches National-Heldengedicht, 1826
• Neue Schweizer Chronik fürs Volk. 3 Bde., 1828-34
• Ansichten eines Obscuranten über Katholicismus und Protestantismus, 1829
• Offener Brief an Herrn Forst- und Kirchenrath Zschokke, 1830
• Die schweizerische Revolution von 1798–1831, 1835
• Die Faraone Aegyptens nach dem ägyptischen, assürischen, sikyonischen, argischen, attischen, kretischen, ilischen, thebischen und küprischen Kanon neu hergestellt, 1837
• Dr. Hennes Vertreibung von der katholischen Kantonsschule in St. Gallen, 1841
• Allgemeine Geschichte von der Urzeit bis auf den heutigen Tag, 1845, 1846
• Das Dasein alteuropäischer Bevölkerung und Kultur. 1847
• Der Sonderbund und dessen Auflösung durch die Tagsatzung im November 1847, mit dem Schauplaze des Krieges und den Bildnissen von Düfour und Ochsenbein. 1848
• Geschichtliche Darstellung der kirchlichen Vorgänge in der katholischen Schweiz von 1830 bis auf unsere Tage, 1851
• Schweizergeschichte für Volk und Schule',' 1857
• Klingenberger Chronk, wie sie Schodoler, Tschudi, Stumpf, Guilliman und Andere benutzten, 1861
• Manethos, die Origines unserer Geschichte und Chronologie, 1865

Literatur

• Franz Xaver Bischof: Anton Henne In: Historisches Lexikon vo dr Schwiiz.
• Karl Reinacher: Erinnerungen an Prof. Josef Anton Henne (Universitätsprofessor in Bern 1842–1855). In: Blätter für bernische Geschichte, Kunst und Altertumskunde, 1917, S. 86–98.
• Alois Senti: Wenn Dichter Politiker werden. Vor 200 Jahren wurde in Sargans der Dichter Anton Henne geboren. in: Terra plana, Nr. 4, 1998, S. 25–31.