Archäologischi Fäischter z Züri

Archäologischi Fäischter z Züri sind Plätz, wo me im Zäntrum vo Züri alti Sache vo de Bougschicht vo de Stadt chan aluege.

Uusstellig im Parkhuus bi de Oopere

Es isch zwar z Züri zu alne Zyte so vil bout worde, ass im Verglych zu anderne Stedt weniger Bouwèèrch oder archäologischi Spuure vo früener no ume sind (defüür hät d Stadt ganz vil wärtvoli Hüüser vo de nöiere und de modèèrne Architäktuur); wämme gnau lueget cha mer aber scho na Rèschte vo alte Geböid oder andernen Yrichtige gfinde. Gmeint sind da jetz emal nöd die bekante und grosse historische Bouwèèrch wie öpe s Grossmöischter und s Fraumöischter oder d Zoufthüüser oder au s Bollwèèrch Chatz, sondern meh die ganz chlyne Sache wome chuum würd aluege wänn se nöd d Lüüt vo de Bouforschig im Ampt für Stedtebou vo Züri agschribe heted. Si händ dènen Oort, wo me bsunderi alti Sache chan gseh, ebe Pfäischter zum id Gschicht luege gsäit.

Im Huus "Zum Rech" am Nöimèèrt 4 isch näbed em Stadtarchyv au s Bougschichtlech Archyv dihei, wo eim die Fäischter chan uftue. Und d Lüüt vo de Fachstell für Underwasserarchäology und Dendrochronology zeiged a der Seefäldstraass 317, wie en Uusgrabig im Zürisee gaat und was me deet scho so gfunde hät.

die archäologische Fäischter

• Im Chäller a de Adrässe Lindehof 4 sind na Muure vo de römische Feschtig uf em Lindehoof und vo de middelalterleche Königsburg, de Pfalz, z gseh.

• Im Chäller vo de Zäntralbiblioteek gseht me d Stadtmuure us em Middelalter und en alti Wasserläitig.

• Under de Wasserchile isch en Findling, wo i de spaatantike Zyyt – so säit’s d Legände – de Felix und d Regula as chrischtlechi Mèèrtürer druff gstorbe sind; und es hät deete no Muure vo eltere Chile und früeni Greeber.

• Under em Sankt Peeter isch Muurwèèrch vo de eltischte Pfarrchile vo Züri erhalte blibe.

• Im Fraumöischter git’s i de Krypta au na alti Muure vo früener und dezue archäologische Fünd z gseh, und es isch öpis über di grooss Gschicht vo dèem uralte Stift z lääse.

• Im Huus "Zum Brunehof" hät’s Wandgmäld us em vierzääte Jaarhundert.

• De schmaali Gang zwüsched de Hüüser Schiffländi 30 und 32 bis zu de Hüüser Oberdorfstraass 25 und 27 isch en alte Eegrabe.

• Under em Sächslitüüteplatz am Utoggèè hät’s im Parkhuus bi de Oopere e Wand mit Sache vo de Seeufersidlige us de Jungstäizyt.

• A de Seefäldstraass 8 isch i de Nazionalbank e chlyni Uusstellig mit archäologischen Objäkt, wo me bim Umbou vo dem Huus gfunde hät.

• Im Parkhuus a de Uraniastraass 3 verzeled d Archäologe uf e bar Dafele öpis vo de Bougschicht uf dèm Platz am Lindehoof.

• Bim Wyyplatz isch d Thermegass, wo me na chly Muurwèèrch vom römische Stadtbad gseht und öpis devo chan lääse.

Bilder

• 
  d Stadtmuure im Chäller vo de ZB
• 
  under de Wasserchile
• 
  en Eegrabe
• 
  im Lindehoof-Chäller
• 
  a de Thermegass

Literatur

• Archäologische Fenster: Zürich-Altstadt. Züri 2018.

Weblink

 Commons: Archäologischi Pfäischter z Züri – Sammlig vo Multimediadateie

• Archäologischi Fäischter z Züri uf de Website vo de Stadt Züri
• Archäologischi Fäischter uf de Website museen-zuerich.ch
• Archäologischi Fäischter – Stadt Züri uf «Gang dur Alt-Züri» (alt-zueri.ch)
• Archäologie und Tourismus in der Schweiz. Unsichtbares sichtbar machen uf tourobs.ch