Hauptmenü ufmache
s Ooperehuus Züri

S Ooperehuus Züri isch es grosses Theaterhuus i dr Stadt Züri.

GschichtBearbeite

S Ooperehuus lyt am Sächsilüüteplatz, naa am Zürisee. Bis ane 1964 hät’s ”Stadttheater“ ghäisse, eerscht sid dänn isch es s ”Ooperehuus“.

Vorhèèr hät’s z Züri s ”Akzietheater“ ggèè, wo ane 1834 uufggangen isch. Das isch i de ehemalige Barfüesserchile am Hirschegraabe ygrichtet gsi, und wo’s i de Neujahrsnacht uf 1890 abebränt isch, hät d Stadt s nöi Theater am See planet.[1] Das Huus staat hüt under Dänkmalschutz. Ane 1891 hät me s Ooperehuus mit de Uuffüerig vo der Oopere ”Lohengrin“ vom Richard Wagner eröffnet. Wo ane 1926 z Züri s Schauspiilhuus pout worden isch, hät sech s Ooperehuus uf Oopere, Operette und Balet ygschränkt. I de Zyt vo 1982 bis 1984 isch s Huus umpout worde. Ane 1994 hät s Stimmvolch vom Kanton Züri zuegstume, dass s Ooperehuus vom Kanton übernaa wèèrd.[2]

Grad näbet em Ooperehuus isch s Bärnhard-Theater.

Organisazioon und UuffüërigeBearbeite

S Ooperehuus hät Stuck vo bekante Komponischte i syni Programm uufgnaa, so vom Jacques Offenbach, em Carl Maria von Weber, vom Giuseppe Verdi und vom Paul Hindemith, vom Richard Strauss, vom Othmar Schoeck, em Arthur Honegger und vil anderne. Vil Uuruffüerige sind z Züri über d Büüni ggange, öppe d Oopere Lulu vom Alban Berg, em Paul Hindemith syn Mathis der Maler, em Arnold Schönberg sys Wèèrch Moses und Aron, und au Stuck vom Heinrich Sutermeister und vom Giselher Klebe.

Vo de berüemte Sänger und Sängerine, wo am Ooperehuus uufträtte sind, cha mer öppe die bsunders erwèène: Lisa della Casa, Kirsten Flagstad, Alfredo Kraus, Agnes Baltsa, Edita Gruberová, Cecilia Bartoli, Vesselina Kasarova, Anja Silja, Elena Moșuc, Leo Nucci, Ruggero Raimondi.

Es git im Ooperehuus au Konzärt, Liederabig und Jazzkonzärt, und dezue spezieli Uuffüerige für Chind und für Familene.

S Orcheschter vo de Oopere heist jetz Philharmonia Zürich, und d Ooperehuus-Tanzgruppe isch s Balet Züri.

S Ooperehuus macht regelmässig a de Programm vo de Zürcher Feschtspiil mit.

LiteraturBearbeite

WeblinkBearbeite

FuessnooteBearbeite

  1. Andreas Kotte (Hrsg.): Theaterlexikon der Schweiz. Chronos Verlag, Zürich 2005, Band 2, S. 1350–1352.
  2. Festschrift zum 175-jährigen Jubiläum der «Theater-Actiengesellschaft». Züri 2009, Syte 67.