Arthur Honegger

Dr Arthur Honegger (* 10. Merz 1892 z Le Havre; † 27. Novämber 1955 z Paris) isch e schwyzerisch-franzesische Kompenischt gsii. Är isch e Verdrätter vu dr Groupe des Six gsii un het rund 200 Wärch kompeniert.

Arthur Honegger (1928)

Lääbe

Syni Eltere sin dr Chaufmann un Kaffeeimporteur Arthur Hongegger un d Julie geb. Ulrich gsii, wu vu Züri chuu sin. Dr Arthur isch z Le Havre ufgwachse un het näb dr Schwyzer au di franzesisch Staatsburgerschaft ghaa.

Scho ase Chind het er Musikunterricht iberchuu un Gyyge glehrt. Vu 1909 bis 1910 het er am Zürcher Konservatorium Violine un Musiktheori biim Willem de Boer un em Lothar Kempter studiert. Ab 1911 isch er wider uf Le Havre zruckgange un het am Pariser Konservatorium wyterstudiert. In dr Kontrapunktklasse vum André Gedalge het er dr Darius Milhaud un dr Jacques Ibert chänneglehrt. Ab 1913 het er z Oaris gläb un het dert ab 1915 het er Komposition bim Charles-Marie Widor un Dirigiere bim Vincent d’Indy studiert. Anne 1918 het er sy Studium abgschlosse un sy erscht aigeständig Wärch kompeniert, s Ballett Le Dit des Jeux du monde. Dr Uruffierig dodervu het im nämlige Johr e Skandal uusglest un het dr Kompenischt beriemt gmacht.

Ab 1920 het er en ängi Beziehig zum Dichter Jean Cocteau pflägt, em gaischtige Vater vu dr Groupe des Six. Sy Durbruch as Kompenischt het er anne 1921 mit em dramatische Psalm Le roi David (Text René Morax) fir s Theater vu Mézières (VD) ghaa. In dr Johre derno sin s beriemt Wärch Pacific 231 un d Opere Antigone (Text Jean Cocteau) entstande. In dr 1930er Johr het er dr Dichter Paul Claudel chänneglehrt un het no Text vum Claudel d Oratorie Jeanne d’Arc au bûcher (1935) un La danse des morts (1938) kompeniert.

dr Arthur Honegger uf ere dytsche Briefmarke (1992)

Im Chriegswinter 1941/42 het er syni zwoot Sinfoni kompeniert. Är het syni Erinnerig an die Zyt, wun er as Musikkritiker un Kompositionslehrer an dr Pariser Ecole normale de musique gschafft het, emol bschriben as „überwiegend thermischer Natur. Es war damals sehr kalt, als ich an der Sinfonie arbeitete, und da ich keine Kohle und kein Holz besaß, habe ich die ganze Zeit in meinem Atelier gefroren.“

Dr Honegger het Wärch us vilne Musikgattige kompeniert un het dodermit bewusst e brait Publikum aagsproche: Chammermusik, Filmmusik, Oratorium, Oper, Operette, Symphoni. Dr Kurt von Fischer bschrybt dr Honegger as e „Art vu Vermittler zwische alemannischer un romanischer Kultur, wu mit dr chinschtlerische Avantgarde in Verbindig drätte sei“

Dr Arthur Honegger isch mit dr Pianischti Andrée Vaurabourg ghyrote gsii, ere Dochter vum Rodolphe Séraphin vu Toulouse. Am 27. November 1955 isch dr Honegger z Paris im Alter vu 63 Johr gstorbe. Är isch dert uf em Fridhof „Cimetière Saint-Vincent“ am Montmartre begrabe wore.

Ehrige un Mitglidschafte

• Mitglid vum Institut de France (1938)
• Dr. h.c. vu dr Universitet Züri (1948)
• Großchryz vu dr Ehrelegion
• Bresidänt vu dr Confédération internationale des sociétés d'auteurs et compositeurs
• Vizebresidänt vum Conseil international de la musique vu dr Unesco
• Syt 1995/96 isch dr Arthur Hongegger uf dr Schwyzer 20-Franke-Note abbildet.

Uusgläseni Wärch

• Szenischi Oratorie:
  • Le Roi David, dramatische/sinfonische Psalm fir Sprächer, Soli, Chor und Orcheschter (1921/1923)
  • Cris du Monde (1931)
  • Jeanne d’Arc au bûcher, Oratorium noch em Paul Claudel (1935/1950)
  • La danse des morts, Oratorium noch em Paul Claudel (Der Totentanz, 1938)
  • Nicolas de Flue (1940)
• Biblisch Drama:
  • Judith, Opere (1925)
• Opere:
  • Antigone, Oper no dr Tragedie vum Sophokles in dr Bearbaitig vum Jean Cocteau (1927)
  • L’Aiglon (1937)
• Operette:
  • Les aventures du Roi Pausole (1930)
  • La belle de Moudon (1931)
  • Les petites Cardinales (1938), zämme mit em Jacques Ibert
• Ballett:
  • Vérité-Mensonge (1920)
  • Skating Rink (1922)
  • Sous-marine (1925)
  • Rose de métal (1928)
  • Un oiseau blanc s’est envolé (1937)
• 5 Sinfonie:
  • 1. Sinfoni (1930)
  • 2. Sinfoni für Strychorcheschter un Trumpete ad libitum (1941)
  • 3. Sinfoni Symphonie liturgique (1946) mit 2. Satz: De profundis
  • 4. Sinfoni Deliciae Basilienses (lat. Basler Freaide; 1946)
  • 5. Sinfoni Di tre re (1950)
• sunschtigi Orcheschterwärch
  • Pastorale d’été, sinfonisch Gedicht fir chlai Orcheschter (1920)
  • Pacific 231, sinfonische Satz Nr. 1 (1923)
  • Rugby, sinfonische Satz Nr. 2 (1928)
  • sinfonische Satz Nr. 3 (1933)
• Filmmusik
  • Napoléon (1926/27)
  • Das Ende der Welt
  • L’Idée (1934)
  • Crime et Chatiment (1934)
  • Les Misérables (1934)
  • Der Dämon des Himalaya (1934/35)
  • Mayerling (1936)
  • Pygmalion: Der Roman eines Blumenmädchens (1939)
• Chammermusik
  • Sonatine fir Klarinette un Klavier
  • 3 Strychquartett
  • Intrada fir Trumpete un Klavier
  • Danse de la chèvre fir Flete solo, 1921
• Chorwerke
  • Kantaten
    • Une Cantate de Noël (1953; sy letscht Wärch)
  • Lieder
• Schrifte
  • Je suis compositeur (Ich bii Kompenischt), Autobiografi (1951)

Literatur

• Hanspeter Renggli: Arthur Honegger. In: Andreas Kotte (Hrsg.): Theaterlexikon der Schweiz. Band 2. Chronos, Zürich 2005, ISBN 3-0340-0715-9, S. 869 f.

Weblinks

 Commons: Arthur Honegger – Sammlig vo Multimediadateie

• Arthur Honegger Websyte (franzesisch un änglisch)
• Kurt von Fischer: Honegger, Arthur. In: Historisches Lexikon vo dr Schwiiz.