Astralgottheit

En Astralgotthait isch e Fachuusdruck vo de Religiosforschig, wo Gotthaite bizaichnet, wo Himelskörper und astronomischi Eraignis verkörperet. Hüüffig bistoot kai dütlichi Trenig zwöschet de Gotthait und sim Himelskörper.

D Vereerig vo Himelskörper werd Astralkult oder Sternvereerig gnennt. De cha aber au do drii bistoo, as aifach nume Sterne abetet oder as Züüge agrueffe wered. Sterne chönet au a de Mensche bsunderi Eraignis vouusäge oder si verstärched Hailmittel und understützed magischi Handlige. Us em mesopotamische Sternekult het sich spöter d Astrologii entwicklet.

Religione wo vor alem Sune, Moo und Planete oder Sterne vereeret und wo die au e zentrale Platz i de Mythe iinemet, wered Astralreligione gnennt. E typische Vertreter devo isch di vorislamischi Religioo vom Jemen.

verschidnigi Sterngotthaite

Zu de Astralgotthaite zälet:

Sunegotthaite, wie Sunna, Sol, Helios, Saule, Surya oder Amaterasu. D Sunegotthait isch je noch Kultuur männlich oder wiiblich.
Moogotthaite, wie Mani, Luna, Selene, Meness, Candrama oder Nanna. Au d Moogotthait cha männlich oder wiiblich sii.
Gotthaite vo de verschidnige Planete, aso em Merkur, de Venus, em Mars, Jupiter und Saturn. Allerdings geltet vili antiki Götter, wie der römisch Göttervatter Jupiter oder de Chriegsgott Mars nöd zu de Astralgotthaite, do d Verbindig mit de Planete erst sekundär entstanden isch. Degege chönet Gotthaite vom Morge- und Oobstern (Aurvandill, Lucifer, Eosphoros, Auseklis oder Ushas) dezue grechnet were.
au Gotthaite vom Morgeroot wered wege de Verbindig mit em astronomische Eraignis vom Suneuufgang zu de Astralgotthaite grechnet, wie Aurora, Eos, Ausrine oder Ushas.
d Plejade wered mengisch vergöttlicht, maist as e Gruppe, so d Sebettu i de mesopotamische Religioo.
au ainzelni anderi Sterne chönet Bistandtail vomene Astralkult sii, so bsundrigs de Sirius oder de Polarstern.

Astralkult bi de Germane

Obwoll Astralgotthaite bi de Germane kai bsunderi Role spilet, schiinet ainzelni Zügnis azdüüte, as Astralkult bi de Germane bikannt gsii isch. So het de Boiocalus, König vo de Ampsivarier d Sune und anderi Sterne aagrueffe und si gfrööget, öb si leers Land möged, nochdem er und sis Volch vo de Chaucer vertribe wore sind.