Dr Balschdaaler Daag

Dr Balschdaaler Daag isch en Eräignis am 22. Dezämber 1830 z Balschdl gsi, wo e Versammlig vo soledurnische Liberale dr Sturz vom reakzionääre Reschiim in iirem Kanton iigläitet häi.

Dr Wääg zur nöije Kantonsverfassig

Nid nume in de Noochberkantöön Baasel und Aargau häi die liberale Chreft, wo vor allem im Landvolk stark gsi si, im Joor 1830 nöije Muet überchoo, wo si vo dr Pariser Bariiser Julirewoluzioon ghöört häi, au im Soledurnische häi die Fortschrittlige mee Demokratii afo verlange. Si häi iiri Fordrige zerst in dr Aarauer «Schweizerzeit» veröffentligt und sä denn im ene Büechli zämmegfasst und im Novämber 1830 as Dänkschrift z Soledurn iigräicht. D Regierig het äigentlig drüber welle äwäggoo, het aber bald gmerkt, ass s Volk Verändrige will. Si het dorum am 15. Dezämber e nöji Verfassig vorgschlaage, wo aber de Liberale vil z wenig wit gange isch. Die häi druf under dr Füerig vom Josef Munzinger us Olte s Landvolk uf e 22. Dezämber uf Balschdl ufbote.

Vo dr Stääge zum «Rössli» us het dr Munzinger verkündet, ass d Suwerenidäät vom Volk iire Usdruck söll finde, ooni öbbis zruggzhalte.

Vor mee as dreiduusig Manne het dr Munzinger dr Verfassigsentwurf vo dr Obrikäit kritisiert und het sälber e Brogramm mit sibzää Pünkt vorgstellt. D Regierig het aber erst afo noochegee, wo si gsee het, ass sich überall im Kanton Lüt zum Landsturm rüste. Am 29. Dezämber het dr Groossi Root dr Verfassigsentwurf im Sinn vo de Liberale gänderet und iin am 13. Januar 1831 em Volk vorgläit. Das het die nöiji Verfassig mit fast nünzig Brozänt vo de Stimme aagnoo.

Kwelle

• Markante Daten zum demokratischen Aufbruch: Freiämtersturm und Balsthaler Tag, Ardikel in dr NZZ, abgrüeft am 15. August 2015