Dr Birkhüüser Verlaag
| Dialäkt: Baseldütsch |
Dr Birkhüüser Verlaag us Baasel isch vo öbbe 1900 bis 2012 e Schwizer Wüsseschafts- und Fachbuechverlaag gsi.
D Archidektuur- und Disäintitel si 2009 an dr spanisch Verlaag Actar vrchauft worde. Wo dä insolwänt worde isch, het De Gruyter 2012 die Brogrammsegmänt übernoo und het für sä witer s Imprint Birkhüüser brucht. Anderi bedütendi Brogramm vo naturwüsseschaftlige Büecher und Zitschrifte (Mathematik, Wüsseschaftsgschicht, Bio- und Ärdwüsseschafte) si sit 1985 bim Springer Basel AG (jetz Springer International Publishing) bliibe, wo für die Ditel s Imprint Birkhäuser Science brucht.
Gschicht
ändereDr Emil Birkhüüser (1850–1930) isch vo Thüringe as junge Schriftsetzer in d Schwiz choo und het 1879 z Baasel en äigeni chliini Druckerei ufdoo. Us dere het sich churz vor 1900 dr Birkhüüser Verlaag entwigglet. 1884 isch er z Baasel iibürgeret worde, und zum Dank an d Schwiz, won em s mööglig gmacht het, erfolgriich chönne z schaffe, het er welle e „patriotischer Werk … von bleibendem Wert“ uusegee. Das isch Bilder aus der Schweizergeschichte vom Historiemooler Karl Jauslin gsi.[1]
Am Aafang het Birkhüüser hauptsächlig Regionallitratuur uusegee, in de 1920er Joor si Fachzitschrifte, Monografie und Leerbüecher drzue choo. In de 1940er Joor isch s Wüsseschaftsbrogramm stark erweiteret worde, wil e Hufe Autore us Dütschland us politische Gründ dört nüme häi chönne publiziere. Im Verlaag si Renommee isch bald wältwit gsi. Spööter si auh Publikazioone zur Ääscheniöörwüsseschaft drzuechoo. Am Aafang vo de 1950er Joor isch e Niiderlassig z Stuttgart gründet worde, 1989 z Cambridge/Massachusetts (U.S.A) und z Boston mit Schwerpünggt in de Beriich Mathematik und theoretischi Füsik.
1985 isch dr Birkhüüser Verlaag an dr Springer-Verlaag verkauft worde, d Druckerei isch an d Baasler Zitig Medie gange, und die het sä 1990 mit de Graphische Betriebe Coop zur Birkhäuser + GBC AG zsämmegschlosse.[2] 1995 het Birkhüüser s Archidektuurbrogramm vom "Artemis – Verlag für Architektur übernoo und in Verlaag integriert. 2002 isch d Disäinzitschrift "form" übernoo worde.
Ändi 2009 het Springer dr Beriich Archidektuur und Disäin an dr spanisch Archidektuurverlaag "Actar", (Barcelona), verkauft wo dr Naame "Gruppe ActarBirkhäuser" aagnoo het.[3] Sit denn het Springer dr Imprint Birkhäuser Science und ActarBirkhäuser dr Imprint Birkhäuser. Über dr Imprint Birkhäuser isch s am 6. Merz 2012 zum e Konkursverfaare choo.[4] Am 24. April 2012 het dr Berliner Verlaag De Gruyter gmäldet, ass er dr Verlaag Birkhüüser as Imprint übernimmt.[5] Sit denn ghöört er zur Undernäämensgrubbe De Gruyter; dr Sitz vo Birkhüüser isch immer no z Baasel.
Weblingg
ändereFuessnoote
ändere- ↑ Hildegard Gantner-Schlee: Karl Jauslins Illustrationen zur Schweizergeschichte. Sonderschrift der SAGW. Universitätsverlag Fribourg, Fribourg 1987.
- ↑ Geschichte machen. Birkhäuser+GBC, archiviert vom Original am 3. Februar 2012; abgruefen am 26. Oktober 2017.
- ↑ Jetzt offiziell: Springer zum Birkhäuser-Verkauf an Actar. In: boersenblatt.net. 16. Dezember 2009, abgruefen am 26. Oktober 2017.
- ↑ Konkursverfahren für Birkhäuser. In: boersenblatt.net. 12. März 2012, abgruefen am 26. Oktober 2017.
- ↑ De Gruyter übernimmt Birkhäuser. De Gruyter, 7. Mai 2012, abgruefen am 15. Mai 2012.