Camille Vidart

D Camille Vidart (* 14. Februar 1854 z Divonne-les-Bains (Pays de Gex); † 28. Juni 1930 z Gämf) isch e franzeesisch-schwyzerischi Gimnasiaalleereri un Fraueräächtleri gsii.

Lääbe

D Camille Vidart isch e Doochter vum Dokter Alphonse Vidart un dr Jean-Louise Vaucher gsii. Si isch ase chlai bi re Dante z Gämf ufgwagse. No dr Schuel het si an dr Uniwersiteet Lyon e Uusbildig zur Sproochleereri gmacht. Druf het d Vidart ab 1875 z Gämf unteriichtet. Ab 1880 isch si Leereri an dr Heechere Deechterschuel z Züri gsii, wu si s Heidi vu dr Johanna Spyri ins Franzeesisch ibersetzt het. Vu 1884 bis 1886 het si an dr École Vinet z Lausanne gleert.

No dr Ruggcheer uf Gämf het si d Vidart dr Fédération abolitionniste internationale aagschlosse. Anne 1891 isch si Mitgliid vu dr fuurtschrittlige Union des femmes de Genève woore, isch 1892 zur Vizebresidänti gweelt woore un het vu 1898 bis 1902 as Bresidänbti vu sällere gamtet. 1896 het si dr 1. Kungräss fir Fraueninträsse organisiert, wu us aaloss vu dr Landesuusstellig z Gämf gsii isch. In dr Joor druf het d Vidart derfiir yygsetzt, ass si di schwyzerische Fraueverain in eme Dachverband zämeschließe. Zäme mit dr Bresidäntene vu dr brogressiive Frauenorganisazioone vu dr dysche un franzeesische Schwyz het si 1899 d Grindig vum Bund vu Schwyzerische Fraueverain (BSF) uf dr Wääg brocht. Bis 1908 isch d Vidart im Voorstand vu sällem gsii. Vu 1899 bis 1904 isch si au Sekreteeri vum Internazionaale Frauebund gsii.

As Pionieri im Kampf um di bolitisch Glyyichberäächtigung isch d Vidart scho frie im Wältbund fir s Frauestimmräächt engaschiert gsii. Si het 1907 mit dr August de Morsier d Association genevoise pour le suffrage féminin ins Lääbe gruefe un het 1909 dr Schwyzerisch Verband fir Frauestimmräächt mitgrindet. Noch em Uusbruch vum Eerschte Wältchrieg isch si as iberzygti Pazifischti em Frauewältbund fir d Feerderig vu internazionaaler Aindraacht un vu dr Internazionaale Fraueliiga fir Friide un Freihait byydrätte. Näb ire feminischtische Aarbet het d Vidart 1910 e Gaschtwiirtschaft fir Arbaiterne un e Biroo fir Aarbetsnoowyys ufgmacht. Si het alliwyyl fir soziaali Gräächtigkait kämpft un het bi verschiidene soziaalrefoormerische Zytschrifte mitgschafft.

Literatur

Émilie Fatio-Naville: Camille Vidart. In: Jahrbuch der Schweizerfrauen. 1930/1931, S. 7–24.
Regula Ludi: Camille Vidart. In: Historisches Lexikon vo dr Schwiiz.
Pionnières et créatrices en Suisse romande XIX^e et XX^e siècles. Service pour la promotion de l’égalité entre homme et femme (Hrsg.). Slatkine, Genf 2004, S. 390–394.

Weblink

d Camille Vidat in Schweizerische Eliten des 20. Jahrhunderts.

Dä Artikel basiert uff ere fräie Übersetzig vu dere Version vum Artikel „Camille_Vidart“ vu de dütsche Wikipedia. E Liste vu de Autore un Versione isch do z finde.