Clara Grosch

D Clara Marianne Sophie Leopoldine Dora Grosch (* 30. Mai 1863 z Karlsrue; † 9. Augschte 1932 z Locarno) isch e dütsch-schwyzerischi Porträtistin gsi.

Yres Läbe

D Clara Grosch isch d Tochter vom Ferdinand Grosch und dr Cora Erdmann gsi. Si het d Schuele z Karlsrue und z Düsseldorf bsuecht. 1902 het si dr Kunschtmoler Jakob Wagner vo Gälterchinde ghürotet. Do si e bekannti Kunschtmolere gsi isch het si yri Bilder wyterhi mit yrem Meitli- oder Künschtlername Clara Grosch signiert. Dur d Hürot isch si Gälterchinder Bürgere worde.

D Künschtlerin

Porträt gmolt vo dr Clara Grosch

D Clara Wagner-Grosch het sich im Damenatelier P. Borgmanns z Karlsruhe, bi R. Risse und W. Sohn z Düsseldorf, K. Gussow z Berlin, G. Courtois und Girardot z Paris zur Porträtischtin lo usbilde. Si het als Porträtischtin vill Ufträge bi dr hessische Hofgsellschaft usgfüert. Im Joor 1900 het si z Paris dr Baselbieter Landschaftsmoler Jakob Wagner kenne gleert und isch mit ym 1902 nach dr Hochzyt ins Tessin nach Locarno go woone. Si het vill Porträtufträg in dr Dütschschwyz, z Dütschland und z Schwede übercho. Yri Bilder si au nach England und Russland gange. Si het Usschtelligserfolg z Berlin und z Münche gfyrt.

Literarischi Verwys

• Schweizerisches Künstler Lexikon 3, 415f

Extärni Verwys

• D Clara Wagner-Grosch im Personelexikon vom Kanton Basel Landschaft
• D Clara Wagner-Grosch im Lexikon vom Schwyzerische Inschtitut für Kunschtwüsseschaft