Emanuel Benjamin Gerster

Dr Emanuel Benjamin Gerster isch e Gälterchinder Eerebürger, Leerer, Aawalt und Politiker gsi. Är isch am 31. Meie 1882 z Gälterchinde uf d Wält cho und am 26. Juni 1968 z Gälterchinde gschtorbe. Är isch reformiert gsi.

Sys Läbe

Dr Emanuel Gerster isch dr Soon vom Ludwig Samuel Gerster, Chaufmaa und dr Salome Bieder gsi. Im Joor 1914 het är d Rosa Elisabeth Gerster vo Gälterchinde ghürotet. Är isch in d Primarschuel z Gälterchinde, d Bezirksschuel z Böckte und drno ins Gymnasium z Basel gange.

Bruef und Politik

Dr Emanuel Gerster het z Basel, z Leipzig und z Bärn Jura schtudiert. Bi dr Chambre internationale d'avocat z Paris het är sich als Aawalt wyterbildet und isch au no in d Übersetzerschuel gange. 1910 bis 1956 isch är Bezirksgrichtspresidänt z Sissech und 1911 bis 1958 z Gälterchinde gsi. Ab 1912 isch är Mitglyd vom Gmeinrot Gälterchinde gsi und 1935 bis 1956 Gmeinipresidänt, drno Bürgergmeinipresidänt. 1918 bis 1941 isch är Presidänt vom Baselbieter Kriminalgricht und 1941- bis 1952 Presidänt vo dr Überwysigsbehörde gsi. Är isch Mitglyd und Vizepresidänt vo dr eidgenössische Schätzigskommission vo dr IV gsi. Vill Joor het är als Rächtskundeleerer an dr Schuel vom Chaufmännische Verein z Lieschtel gschafft. 1957 hei yn d Gälterchinder zum Eerebürger gmacht.

Literarischi Verwys

• Basellandschaftliche Zeitung 31.5.1967, 28.6.1968
• Basler Nachrichten 29./30.6.1968

Extärni Verwys

• Dr Emanuel Gerster im Personelexikon vom Kanton Basel Landschaft (Site cha nüme abgrüeft wärde; Suche im Webarchiv)[1] [2] Vorlage:Toter Link/www.baselland.ch