Ernst Fuchs

Dr Ernst Fuchs (* 13. Februar 1930 z Wien, † 9. Nofämber 2015 au z Wien ) isch en östriichische Mooler, Archidekt, Grafiker und Muusiker gsii. Er gältet as äine vo de Gründer vo dr Wiener Schuel vom Fantastische Realismus.

dr Ernst Fuchs, Wien 2007

Läbe

Dr Ernst Fuchs isch s äinzige Chind vom Maximilian und dr Leopoldine Fuchs gsi. Si Groossvater Siegmund und si Vater si noch em „Aaschluss“ vo Östriich 1938/39 emigriert, und dr Ernst isch 1942 römisch-kaddolisch dauft worde. Vo 1942 aa het en dr Mooler und Restaurator Alois Schiemann im Moole underrichdet. Bis er fuffzääni gsi isch het er bi dr Emmy Steinböck und bim Fritz Fröhlich an dr Moolschuel St. Anna z Wien Bildhauerei und Moolerei gleert.

Denn isch er uf d Akademii vo de bildende Künst z Wien. 1949 het er si ersti Äinzelusstellig z Bariis gha, und isch 1950 dört aane züüglet. 1957 isch er e Zitlang im Dormitio-Chlooschter am Bärg Zion (Israel) gsi und het sich mit Ikonemoolerei beschäftiget. 1962 isch er uf Wien zrugg und isch dört Brofässer worde. Er zelt zämmen mit em Wolfgang Hutter, em Arik Brauer, em Rudolf Hausner und em Anton Lehmden zu de Gründer vo dr Wiener Schuel vom Fantastische Realismus. 1972 het er d Otto-Wagner-Villa gchauft und dört mit dr Brunneaalaag Nymphäum Omega aagfange. S „Brivatmuseum Ernst Fuchs“ isch hüte dört. Dr Mooler hät ab 1988 z Monaco gläbt und gschafft.

d Otto-Wagner-Villa z Wien

s „Nymphäum Omega“ und de „Moses-Brunne“ im Park vo de Villa Wagner

d „Sphinx“ (1977, Bronze uf Marmorsockel) im „Ernst Fuchs Museum“ z Wien

Zerst het er im surrealistische Stiil, spööter im manieristische gmoolt. In sine Wärk het s vilmol e religiöösi oder müthologischi Symbolik. In sim Buech „Architectura Caelestis“ het er gschriibe, ass e Hufe vo sine Motiiv us Visioone chieme. Z Bariis het er e Hufe ikonografischi Arbäite gmacht, wo vo dr fläämische Moolerei beiiflusst si. Drei vo deene Wärk si spööter s Altarbild vo dr Rosechranzchille z Wien-Hetzendorf worde.

Us de 1970er-Joor stamme Skulptuure und e baar Opereusstattigen (Parsifal und Die Zauberflöte z Hamburg, Lohengrin z Münche). Im Mozart si Zauberflöte het er denn 1996 non emol usgstattet. In de 1970er-Joor het er Lyrik und filosofischi Essei gschriibe.

Dr Fuchs het uf müstisch inspirierte Schallblatte gsunge und gspiilt, u. a. d Album „Von Jahwe“ (Gsäng über s Tetragramm JHWH) und „Via Dolorosa“, und er het immer wider mit Muusiker zämmegschafft, won er as Sänger sini spirituelle Motiiv umgsetzt het. So z. B. s Album „Aphrica“ mit em Klaus Schulze (1983); er het das aber spööter zruggzooge, wäge künstlerische Differänze. Er het hau u. a. mit em Chris Karrer vo Amon Düül II im Joor 1994 zämmegschafft und d DoCD „Mystische Gesänge“ uusegee.

In de 1990er-Joor isch dr Fuchs mee as künstlerische Gstalter vo Bauwärk däätig gsi (St.-Jakob-Chille z Thal bi Graz, e Hotelaalaag z St. Veit an der Glan). Si fantastischi Archidektuur isch vor Allem wäge dr üppige Ornamentik und de chreftige Farbe ufgfalle, won er brucht het.

Modärni Wärk vom Fuchs het mä sit de 1980er Joor uf Usstellige z Östriich, Dütschland, Italie, Japan, Russland und in andere Länder chönne gsee.

Dr Fuchs het e Hufe Künstlerfründ ghaa, drunder dr Salvador Dalí, dr Arno Breker, Mati Klarwein und d Leonor Fini. 1975 isch dr Fuchs dr Jüngst in dr Künstlerfründschaft «Goldigs Dreiegg» gsi, wo dr Salvador Dalí drüber gsäit het, ass mä s chönn aaluege wie mä well, Breker-Dalí-Fuchs sige immer oobe.

1987 het dr Ernst Fuchs dr Falco bordretiert. Was die bäide gschwätzt häi wäärend em Moole, häi si ufgnoo und es isch zum 50. Geburtsdaag vom Falco im ORF gsändet worde.

2005 het dr Reschissöör und Broduzänt Jürgen Haase e Bordret vom Ernst Fuchs im Dokumentaarfilm Mit den Augen der Seele. Straßensänger und Kaiser wollt' ich werden gmacht.

Uszäichnige

• 1972: Briis vo dr Stadt Wien für Bildendi Kunst
• 2004: s östriichische Eerechrüz für Wüsseschaft und Kunst I. Klass
• 2010: s Groosse Eerezäiche vom Land Kärnte
• 2010: s Goldige Earezäiche für Verdienst um s Land Wien

Wärk (Uswaal)

s Hotel „Ernst Fuchs Palast“ z St. Veit/Glan (Kärnte)

• s Rosechranz-Triptychon in dr Pfarrchille z Hetzedorf (Wien)
• dr Moses-Brunne z Bärnbach (Steiermark)
• e Sonderbriefmarke im Joor 1982, as Däil vom Satz Moderne Kunst in Österreich

Büecher und CD

• Ernst Fuchs: Architectura Caelestis – Bilder des verschollenen Stils, Paperback, 223 S., Mit 15, teilweise farbigen Tafeln und zahlreichen Abbildungen im Text, 1966
• Album der Familie Fuchs (Salzburg: Residenz, 1973)
• Im Zeichen der Sphinx: Schriften und Bilder, ed. Walter Schurian (Münche, Dtv, 1978)
• Aura: Ein Märchen der Sehnsucht (Münche: Dtv, 1981)
• Der Prophet des Schönen: Arno Breker (Marco, 1982)
• Von Jahwe: Gedichte (Münche, 1982)
• Ernst Fuchs: Phantastisches Leben. Erinnerungen. 1. Ufl. Berlin 2001. ISBN 3-463-40401-X
• Mystische Gesänge (Doppel-CD)
• Dervish Kiss (CD vo und mit em Chris Karrer)

Liddratuur

• Friedrich Haider: Ernst Fuchs: Zeichnungen und Graphik aus der frühen Schaffensperiode 1942 bis 1959. Löcker, Wien 2003. ISBN 3-85409-387-X
• Walter Schurian (Text), Gerd Lindner (Hg.): 1900 bis 2010: Phantastische Kunst aus Wien. Panorama-Museum, Bad Frankenhausen 2010. ISBN 9783938049174 (mit Abb., auch von und über Brauer, Hausner, Hutter und Lehmden)
• Theo Rommerskirchen: Ernst Fuchs. In: viva signatur si! Remagen-Rolandseck 2005. ISBN 3-926943-85-8
• Ernst Fuchs: Der Feuerfuchs. Umschau, 1988. ISBN 3-524-70004-7

Weblingg

 Commons: Ernst Fuchs – Sammlig vo Multimediadateie

• Ernst Fuchs (ernstfuchs-zentrum.com)
• Galerii Ernst Fuchs (ernstfuchs-gallery.com)
• Ernst Fuchs Museum (ernstfuchsmuseum.at)
• Ernst Fuchs in dr Galerie10 (galerie10.at)
• seer früeji Radierige vom Ernst Fuchs (Website chan zur Zit nöd abgruefe wärde)
• Iidrag über Ernst Fuchs (Maler) in: Austria-Forum, em öschteriichische Wissensnetz – online

• Ernst Fuchs in dr Galerie Menssen (galerie-menssen.de)

Fuessnoote

Dä Artikel basiert uff ere fräie Übersetzig vum Artikel „Ernst_Fuchs_(Maler)“ vu de dütsche Wikipedia. E Liste vu de Autore un Versione isch do z finde.