Fournet-Blancheroche

Fournet-Blancheroche isch e Gmeind im französische Departemänt Doubs.

Fournet-Blancheroche
Verwàltung
Land	Frànkrich
Region	Bourgogne-Franche-Comté
Département	Doubs (25)
Arrondissement	Montbéliard
Kànton	Maîche
Kommünàlverbànd	Pays de Maîche
Àmtliga Nàma	Fournet-Blancheroche
Maire	Pierre-Jean Wycart (2014-2020)
Code Insee	25255
Poschtlaitzàhl	25140
Iiwohner
Iiwohner	350
Flech	13,08 km2
Bevelkerungsdicht	27,83 Iiw./km2
Làg
Koordinate	47° 10′ 04″ N, 6° 49′ 34″ E
Heche	943 m
Fournet-Blancheroche Fournet-Blancheroche (Frànkrich)

Geografi

Si lyt im Chreis «Mömpelgart» und a der Landesgränze zu der Schwiiz wisawi vom Piet vo der nöieburgische Stadt La Chaux-de-Fonds. Das isch zmitzt im nördleche Bärgland vom Jura, und uf der Südsyte und im Oschte, a dr Schwiizer Gränze, chunt der Gmeindbann, wo 13 Kwadratkilometer gross isch, bis abe is gäche Tobel vom Doubs, wo dört dur de Stausee vo Biaufond flüsst; dä het’s ggää, wo s Société des Forces Motrices du Refrain anne 1909 uf em Platz am Fluss, wo früener en alti Müli und spööter en Saagi gstanden isch, d Staumuur Barrage du Refrain für nes Chraftwärch bout het. Sid em Bou vo däm Wärch goot e schmali Strooss bi Le Refrain zum Fluss abe, und im 2010ni isch bi der Muur es nöis Maschinehuus anecho. Ussert am Fluss unde git’s keini Gwässer ufem Bode vo der Gmeind, wil s Wasser im vercharschtete Chalch versikeret; das gseht me guet a de vile Dolyne und de baar Wasserlöcher uf em höche Platoo bi de Dörfer obe.

D Gmeind het vil Waldgebiet. Im Kulturland sind d Dörfer und d Wyler Fournet, Blancheroche, Le Mont Pré, Philibert und Le Refrain. Vo Fournet uus goot e Strooss dr stotzig Bärg abe zu der Zollbrugg am Doubs und wyter uf Chaux-de-Fonds.

D Nochbergmeinde vo Fournet-Blancheroche sind Bonnétage, Frambouhans, Les Écorces und Charquemont im Französische und i dr Schwiiz Les Bois und La Chaux-de-Fonds.

Weblink

 Commons: Fournet-Blancheroche – Sammlig vo Multimediadateie