Gerard Dou

Dr Gerard Dou, au Gerard Douw oder Gerrit Dou, (* 7. April 1613 z Leiden; begraabe am 9. Februar 1675 z Leiden) isch e niiderländische Mooler us em Barock gsi. Wäge siner Liideschaft für minuziöösi Detäi und siner volländete Technik gältet er as dr Gründer vo dr Leidener Fiinmoolerei, wo wit bis ins 18. Joorhundert iine pflägt worde isch.

Lääbe

Dr Dou het bi sim Vater Douwe Jansz, eme Glasmooler, e Leer gmacht. 1624 isch er zum Bartholomeus Dolendo gange, denn isch er zwäi Joor bim Glasmooler Pieter Clouwenhorn gsi und schliesslig drei Joor in dr Wärkstatt vom Rembrandt z Leiden. Sit 1632 het er sälbstständig z Leiden gschafft. 1648 isch er Mitgliid vo dr Leidener Lukasgilde worde. Scho zu Läbzite isch er seer berüemt gsi.

Dr Iifluss vom Rembrandt isch am Aafang grooss gsi. Dr Dou het vo iim vo däm sine Eltere Bortreit gmoolt. Vo 1640 aa si usgezäichneti Schanerbilder vom Dou bekannt, won er in chliinem Format gmoolt het. Die Szeene schbiile sich mäistens in dunkle und änge Rüüm ab.

Dr Gerard Dou het e Hufe Schüeler und Noochfolger ghaa. Dr bedütendst und dröist isch dr Frans van Mieris gsi.

D Wärk hüte

Öbbe 200 Wärke vom Dou si bekannt. Die wichdigste Arbäite befinde sich hüte im Rijksmuseum Amsterdam, im Louvre z Bariis und in dr National Gallery z London. Au d Gemäldegalerie Alte Meister het mee as e Dotzed vo sine Gmäld, drunder z. B. s Trompe-l'œil Stilllääbe mit Lüüchter.

Au uf em Kunstmärt si d Wärk vom Dou ghandlet worde. 2001 isch s Mäisterwärk Dr Zaanarzt bi Van Ham Kunstauktionen z Köln zum Ufruef choo. Die Holzdaafele, wo 38,8 × 26,6 cm grooss isch, isch 1900 im Amsterdamer Stedelijk Museum usgstellt worde und 1923 vom Berliner Kunsthändler Paul Cassirer verstäigeret worde. Vo 1929 aa isch s Gmäld in ere middelrhiinische Brivaatsammlig gsi. Bim Van Ham isch Dr Zaanarzt 2001 für 5,7 Millioone DM verchauft worde und isch noch em Handelsblatt vom 3. Juli 2001, s düürste dütsche Aukzioonsbild gsi. Hüte befindet sich das Wärk im Kimbell Art Museum z Texas.

Liddratuur

Ludwig Lemcke: Dou, Gerhard. In: Allgemeine Deutsche Biographie (ADB). Band 5, Duncker & Humblot, Leipzig 1877, S. 366 f.

Weblingg

Commons: Gerard Dou – Sammlig vo Multimediadateie

Gerrit Dou in VAN HAM Lexikon der Kunst. VAN HAM Art Publications, Köln.

Dä Artikel basiert uff ere fräie Übersetzig vu dere Version vum Artikel „Gerard_Dou“ vu de dütsche Wikipedia. E Liste vu de Autore un Versione isch do z finde.