Dialäkt: Baseldütsch

Dr Heinrich II. vo Thun († 17. Februar 1238 z Baasel) isch vo 1216 bis 1238 Bischof vom Fürstbistum Baasel gsi und e groosse Förderer vo dr Stadt Baasel.

Biografii ändere

Die freiherrligi Familie vo Thun isch us em Bärner Oberland cho, und dört isch dr Heinrich ufgwaggse.[1] Wo dr Bischof Walter vo Röttele abgsetzt worde isch, isch dr Heinrich vo Thun 1216 an sim Blatz zum Bischof vo Baasel gweelt worde.

Es het nid lang brucht, und er het in dr Stadt Find gmacht, wil er s fertig brocht het, ass s Rootbriwileg vo dr Stadt Baasel, wo si e baar Joor vorhär am 13. September 1218 vom Köönig Friedrich II. überchoo het, wider ufghobe worde isch, und kä Root me het döfe iigsetzt wärde, ooni dass dr Bischof em zuegstimmt hätt.

Dr Bischof Heinrich vo Thun isch in d Baasler Stadtgschicht iigange, won er die erste Baasler Rhiibrugg het lo baue, dört wo hüte die Middleri Brugg stoot. Sälli Brugg wird zum erste Mol in zwäi Urkunde vo 1225 erwäänt, wo din stoot ass dr Heinrich s Blääsikloster und s Kloster Bürgle vom Bruggezoll befreit het, wil si dr Bau mit finanzielle Middel understützt häi.

Dr Heinrich het de zwäi Bättelorde vo de Franziskaner und vo de Dominikaner erlaubt, z Baasel Klöster z gründe, s Barfüesserkloster und s Breedigerkloster.

Dr Bischof Heinrich II. isch in dr Krypta vom Baasler Münschter begraabe.

Lueg au ändere

Litratuur ändere

Weblingg ändere

Fuessnoote ändere

  1. Franziska Hälg-Steffen: Thun, von (Freiherren). In: Historisches Lexikon vo dr Schwiiz.; mä sött sä nit mit dr Ministerialefamilie vo Thun verwäggsle.
  Dä Artikel basiert uff ere fräie Übersetzig vum Artikel „Heinrich_von_Thun“ vu de dütsche Wikipedia. E Liste vu de Autore un Versione isch do z finde.