Heinz Stefan Herzka

Dr Heinz Stefan Herzka (* 1. Februar 1935 z Wien; † 14. Februar 2021) isch e Schwyzer Chinderdokter, Chinderpsichiater un Brofässer an dr Universitet Züri gsii.

Lääbe

Dr Herzka isch anne 1935 as Suhn vu dr Psichologi Dr. Else Freistadt Herzka († 1953) un em Buechhalter Hans Herzka z Wien uf d Wält chuu. Anne 1938 isch d Familie in d Schwyz emigriert, wu dr Herzka z Amden, z Gämf un z Züri ufgwagse isch. Vu 1954 bis 1961 het er z Züri un z Basel Medizin studiert. Sy Studium het er 1961 mit em medizinische Staatsexame un ere Dissertation abgschlosse. Anne 1960 het dr Herzka d Irène Langsam ghyrote, us däre Ee het er drei Chinder ghaa. No dr Drännig 1979 het er 2000 d Verena Nil ghyrote. In syre medizinische Laufbahn isch er 1962 bis 1967 Assischtänzdokter z Leiden (NL) un z Sheffield (GB) gsii un het e Uusbildig zum Chinderdokter FMH (1965), Chinder- un Jugedpsichiater un Psichotherapeut z Aarau un z Züri gmacht. Anne 1968 isch er Oberdokter vvu dr psichiatrische Universitetspoliklinik fir Chinder un Jugedligi z Züri wore. 1969 het dr Herzka as Privatdozänt fir Chinder- un Jugedpsichiatry an dr medizinische Fakultet vu dr Universitet Züri zum Thema Psichopathology vum Chinds- un Jugedalter habilitiert. Vu 1971 bis 1985 isch er laitende Dokter vu dr Zwyg- un Regionalstelle vum Chinder- un Jugedpsichiatrisch Dienscht vum Kanton Züri gsii. Ab 1975 het er e nei grindeti Dagesklinik glaitet, wun er ab 1974 blant un ufböue het, 1998 isch er as laitende Dokter zrugdrätte. Ab syre Emeritierig 2001 isch dr Herzka Supervisor fir Chinderpsichotherapy z Züri gsii un het an verschidene Fachhochschuele glehrt.

Ab 1980 isch dr Herzka all Johr uf Raise dur d Wält im Zämehang mit em aigene Projekt "Schalmeie vu dr Wält" gange. S Baar Herzka Nil het mit dr Schänkig vu ire Sammlig vu Musikinschtrumänt un Kulturobjäkt s Museum MúSIC musée des instruments et des cultures du monde im franzesische Céret grindet, di international grescht Sammlig vu dradizionälle Schalmeiinschtrumänter.

Dr Vorloss vum Herzka het er anne 2007 sälber zum Archiv fir Zytgschicht brocht, mit Foto, Familiefilm un Lehrmaterialie. E Großdail vum Bstand gojht um sy Effetligkaitsarbet: Publikazione, Bydreg in Biecher un Radio- un Färnsehsändige. Dr Nooloss vu vu syne Eltere Else un Hans Freistadt-Herzka isch au im Archiv fir Zytgschicht. Dr Herzka isch im Februar 2021 im Alter vu 86 Johr gstorbe.

Uusgläseni Schrifte

• Das Kind im geistigen Klima. Francke, Bern 1968.
• Spielsachen; Auswahl und Bedeutung für das gesunde und das behinderte Kind. 3. Auflage. Schwabe, Basel 1974.
• Gesicht und Sprache des Säuglings. Schwabe, Basel 1979.
• Konflikte im Alltag. Schwabe, Basel 1983.
• Das Kind von der Geburt bis zur Schule. Bilderatlas und Texte zur Entwicklung des Kindes. 6. Auflage. Schwabe, Basel 1984, ISBN 3-7965-0685-2.
• Schalmeien der Welt. Volksoboen und Volksklarinetten – Verbreitung und Geschichte der Musikinstrumente mit dem magischen Klang. Schwabe, Basel 2003, ISBN 3-7965-1969-5.
• Kinderverträglich denken und handeln. Schwabe, Basel 2005, ISBN 3-7965-2127-4.
• Unterwegs im Zwischen. Emigrantenkind, Kinderpsychiater, Schalmeiensucher. Eine Autobiographie. Huber, Frauenfeld/ Stuttgart/ Wien 2007, ISBN 978-3-7193-1442-2.

Zäme mit andere Autor*ne:

• Heinz Stefan Herzka, Martin Fulda, Wolf Reukauf, Anne-Lise Weiss: Kinderpsychiatrische Krankheitsbilder. Schwabe, Basel/ Stuttgart 1978, ISBN 3-7965-0686-0.
• Heinz Stefan Herzka, Wolf Reukauf: Kinderpsychopathologie. Ein Lehrgang. Schwabe, Basel/ Stuttgart 1981. (2., ergänzte Auflage. 1986, ISBN 3-7965-0846-4.)
• Heinz Stefan Herzka, Wolf Reukauf, Hanna Wintsch (Hrsg.): Dialogik in Psychologie und Medizin. 1999, ISBN 3-7965-1051-5

Weblink

• Websyte vum Heinz Stefan Herzka
• Literatur vu un iber Heinz Stefan Herzka in dr bibliografische Datebank WorldCat
• Nooloss bim Archiv fir Zytgschicht (PDF)
• "MúSIC musée des instruments et des cultures du monde"

Fueßnote

Dä Artikel basiert uff ere fräie Übersetzig vu dere Version vum Artikel „Heinz_Stefan_Herzka“ vu de dütsche Wikipedia. E Liste vu de Autore un Versione isch do z finde.