Jakob I. vu Bade

Dialäkt: Undermarkgreflerisch

Dr Markgrof Jakob I. vu Bade (* 15. März 1407 z Hachberg; † 13. Oktober 1453 z Mühlburg) het vu 1431 bis 1453 d Markgrofschaft Bade regiert.

Lääbe

Dr Jakob I. vu Bade isch dr eltscht Suhn vum Markgrof Bernhard I. vu Bade un dr Anna vu Oettingen gsii. Dr Vater isch seli religiees gsii un het as Chilchestifter gwirkt, wäge däm sin au syni Chinder e sträng religiees erzoge wore. Är het s Chloschter Fremersberg gstiftet un het derfir gsorgt, ass Stiftschilche Bade-Bade wichtiger woren isch. Dr Jakob I. isch s gegedail vu sym Vater gsii. Dr Enea Silvio de Piccolomini het en eso karakterisiert: "Wäg synere Grächtigkait un Schlaii unter dr Dytsche beriemt".

In junge Johr isch er Verwalter vu dr Bsitzige z Hohenberg, bis er im Alter vu 24 Johr d Regierig vu Bade ibernuu het. Är isch e strytbare Ritter un e sparsame Landesvater gsii, un d Firschte hän en ghärn as Schlichter ghaa. Beedi Chaiser – dr Siegmund un dr Friedrich III. –, wun er drunter dient het, hän en arg gschätzt.

Wu syni Schweschter Agnes im Stryt um d Erbfolg, wäg ere Friegeburt dur e vorehligi unebebirtigi Bezieig mit eme badische Adlige, gflichtet isch, het dr Markgrof Aasprich z Schleswig verlore. Är het si dodriber eso gergeret, ass d Agnes ire Lääbe lang z Ebersteinburg yygsperrt het. Dr Vorfall isch in d Gschicht as "Zwillingssturz vu Gottorf" yygange.

Wu 1437 dr Sponheimer Verdrag in Chraft drätten isch, het er Bsitzige an dr Mosel kriegt. Fir 30.000 Gulde het er 1442, vu dr Noofahre vum Walter vu Geroldseck, d Helfti vu dr Herrschaft Lohr un Mahlberg gchauft.

Ruine Hochebade

Är het sy Stammsitz uf dr Burg Hochebade hoch iber dr Stadt Bade-Bade ghaa. In syre Regierigszythet er d Burg zum Schloss mit iber 100 seli representative Ryym uusböue. Mer cha hite di erhalte Ruine go aaluege.

Eh un Chinder

Är het am 25. Juli 1422 d Katharina vu Lothringe ghyrote. Us däre Verbindig sin die Chinder firigange:

Karl (* 1427; † 24. Februar 1475 z Pforze) ⚭ 1447 z Pforze Katharina vu Eschtrych
Bernhard (* 1428 z Pforze; † 15. Juli 1458 in Moncalieri/Oberitalie), seliggsproche
Johann (* 1434; † 9. Februar 1503 z Ehrenbreitstein); Erzbischof vu Trier
Georg (* 1433; † 11. Februar 1484 z Moyen), Bischof vu Metz
Markus (* 1434; † 1. Septämber 1478); Bischof vu Lüttich
Margarete (* 1431; † 24. Oktober 1457 z Ansbach) ⚭ 1446 z Heilsbronn Albrecht III. vu Brandenburg
Mathilde † 1485, Äbtissi z Trier

un

Rudolf, unehlige Suhn, Komtur vu dr Johanniterkommende Iberlinge

Literatur

Arthur Kleinschmidt: Jacob I., Markgraf von Baden und Hochberg. In: Allgemeine Deutsche Biographie (ADB). Band 13, Duncker & Humblot, Leipzig 1881, S. 532–534.
Konrad Krimm: Jakob I., Markgraf von Baden. In: Neue Deutsche Biographie (NDB). Band 10, Duncker & Humblot, Berlin 1974, ISBN 3-428-00191-5, S. 311.
Johann Christian Sachs: Einleitung in die Geschichte der Marggravschaft und des marggrävlichen altfürstlichen Hauses Baden. Zweyter Theil. Lotter, Carlsruhe 1767, S. 305–378 (Iigschränkti Vorschau uf books.google.de).
Oskar Joseph Münch: Markgraf Jakob I. von Baden, Dissertation, H. M. Poppen & Sohn, Freiburg 1906

Vorgänger	Amt	Nachfolger
Bernhard I.	Markgrof vu Bade 1431–1453	Georg
Johann V.	Grof z Sponheim 1437–1453	Georg

Dä Artikel basiert uff ere fräie Übersetzig vu dere Version vum Artikel „Jakob_I._(Baden)“ vu de dütsche Wikipedia. E Liste vu de Autore un Versione isch do z finde.