Johann Ulrich von Salis-Soglio

Dr Johann Ulrich vo Salis-Soglio (* 16. Merz 1790 z Chur; † 27. April 1874 z Chur) isch e Schwiizer Militär gsi.

Dr Johann Ulrich vo Salis-Soglio uf eme Stich us em 19. Johrhundert

Dr Johann Ulrich vo Salis-Soglio het us em reformierte Bündner Adelsgschlächt vo de Salis gstammt. Scho in junge Johr het er e milidärischi Karriere gwehlt und isch scho 1809 Offizier in dr Bündner Miliz gsi. Zwüsche 1809 und 1839 het er sich as Offizier in fremde Dienst z Bayre und de Niiderlande bis in Rang vom ene Generalmajor hochdient. Er isch 1841 im Rang vom ene Oberst in dr Generalstab vo dr Schwiizer Armee iidrätte und het 1844 dr Ufdrag übercho, in de Unrueh im Wallis zwüsche de Parteie z vermittle oder en eidgenössischs Ufgebot iizsetze. Wil er mit em Sonderbund sympatisiert het isch er im August 1847 as Generalstabschef entlo worde. Au wenn er reformiert gsi isch, het er im Herbst 1847 as General s Oberkommando über d Armee vom konservativ-katholische Sonderbund im sog. Sonderbundschrieg übernoh. Noch dr Kapitulation vo de Sonderbundskantön am 29. Novämber isch dr Salis-Soglio über s Wallis in d Lombardei gflüchdet.

Mä het en wäge Landesverroot aklagt, es isch aber nie zum Prozäss cho. Dr Salis-Soglio isch noch eme churze Exil in d Schwiiz zruggcho, wil mä sich do entschiide het, ass dr Versöhnigsprozäss wichdiger siig as e Bestroofig, und het bis zu siim Dod sehr zruggzoge z Chur gläbt.

Literatur

• Adolf Collenberg: Salis, Johann Ulrich von (Soglio). In: Historisches Lexikon vo dr Schwiiz.
• Georg von Wyß: Salis-Soglio, Johann Ulrich von. In: Allgemeine Deutsche Biographie (ADB). Band 30, Duncker & Humblot, Leipzig 1890, S. 249–251.