Johannes Bussinger
Dr Johannes Bussinger (* 22. Dezämbr 1825 z Gälterchinde; † 7. Septämbr 1889 z Lieschtel) isch e Aawalt und Politiker vo Gälterchinde gsi. Är isch e reformierte Bürger vo Gälterchinde gsi.
Sys Läbe
ändereDr Johannes Bussinger isch dr Soon vom Johannes Bussinger, Schuemacher und vo dr Eva Erb gsi. Im Joor 1852 het är d Anna Strub vo Läufelfinge ghürotet.
Sy Usbildig
ändereDr Johannes Bussinger isch in d Primarschuel z Gälterchinde und in d Bezirksschuel z Böckte gange. Drno isch är in s Gymnasium z Basel und het vo 1846 bis 1849 z Basel, Heidlbärg und Bonn Jurischt gschtudiert.
Sy Bruef und syni Ämter
ändereDr Johannes Bussinger het als Advokat und Notar gschafft. In de Joore 1849 bis 1859 isch är Presidänt vom Baselbieter Kriminalgricht und vo 1850 bis 1863 vom Bezirksgricht Sissech gsi. Vo 1850 bis 1863 het är s Gemeinipresidium z Gälterchinde gha. Är isch Vorschte`er vom Armenerzyeigsverein im Bezirk Sissech gsi. Als Verträter vo dr Ordnigspartei isch är vo 1853 bis 1863 im Landrot gsässe, 1858 und 1861/62 als Landrotspresidänt. 1854 bis 1857 wird är Nationalrot vo de Linksfreisinnige. D Oberbaselbieter hei yn nid gärn gha und hei yn aagfindet. Dorum isch är 1863 nach Lieschtel zoge und het dörte es Aawaltsbüro ufdoo. Vo 1868 bis 1870 isch är im Verwaltigsrot vo dr Basellandschaftlige Kantonalbank gsi. Vo 1870 bis 1889 isch är Regierigsrot gsi und het s Justiz- und Chilledepardement unter sich gha. Im Kulturkampf het är, durch sy Grechtigkeitssinn, s Vertroue vom ganze Volk gha.
Literarischi Verwys
ändere- Basellandschaftliche Zeitung 111, 112, 1889
- National Zeitung 22.9.1889
- Birmann Martin: Gesammelte Schriften, Basel 1894, Band 2, 493-498
- Gauss Karl et al.: Geschichte der Landschaft Basel 2, 564, 607, 628f., 640
- Historisch-biographisches Lexikon der Schweiz 7 (Supplement), 38
- Gruner 1966, 475