Kischinau

Flagge und Wappe
Charte
Stadtdate
Amtssprache:	Rumänisch
Geographische Lage:	47° 1′ N, 28° 51′ O47.01388888888928.85
Höhe:	ca. 85 m.ü.M.
Flechi:	Stadt Chișinău: 120 km² Munizip Chișinău: 635 km²
Iiwohner: (1. Januar 2011)	Stadt Chișinău: 664.700 Munizip Chișinău: 789.500   drvo Stadt: 719.600   drvo Land: 69.900
Bevölkerungsdichte:	4.938 Iiwohner pro km²
Stadtgliederig:	5 Stadtbezirk
Flughafe:	Flughafe vo Chișinău (KIV) Distanz: ca. 15 km
Bürgermeister:	Dorin Chirtoacă
Offizielli Website:	www.chisinau.md
Chișinău – Satellite-Ufnahm

Chișinău [kiʃiˈnəu̯] (dütsch Kischinau oder veraltet Kischenau/Kischinew, gagausisch Kişinöv, russisch Кишинёв/Kischinjow isch d Hauptstadt vo dr Republik Moldau.

D Stadt het e Flechi vo 120 km². Si isch mit öbbe 664'700 Iiwohner (was 13 Brozänt vo dr Bevölkerig vom Land isch; Stand 1. Januar 2011) d Stadt, wo am mäiste Lüt läbe im ganze Land.

Gschicht

Kischinau wird zum erste Mol im 15. Johrhundert erwähnt, wo s zum Osmanische Riich ghört het. Im Friide vo Bukarest 1812 isch s an Russland gfalle. Im 19. Johrhundert het sich d Stadt stark afo vergöössere und si isch e wichdigs Zentrum vom osteuropäische Juudedum worde.

D Juudeverfolgige im 20. Joorhundert

Um 1900 si fast d Helfti vo dr Bevölkerig Juude gsi. Die zaristischi Gheimpolizei Ochrana het dr Antisemitismus gföörderet und im April 1903 si fast fufzig Juude im ene Pogrom ermordet worde. Dä isch as Pogrom vo Kischinjow in dr Bress uf dr ganze Wält kritisiert worde. 1905 isch s wider zu Unruehje cho, und Liberali, Sozialdemokrate und Juude si aagriffe worde. Das het drzue gfüehrt, ass e grossi Zahl vo Juude uf Amerika und Palestina usgwanderet si.

Kischinau isch am 10. Novämber 1940 im ene starke Ärdbeebe däilwiis zerstört worde und im dütsch-sowjetische Chrieg, wo am 22. Juni 1941 aagfange het, fast vollständig em Äärdboode gliichgmacht worde. am 17. Juli 1941 isch si vo dr dütsche Wehrmacht und ihre rumänische Verbündete erooberet worde. Denn het e Massemord an de Juude aagfange und öbbe 10'000 Juude si umchoo, die Überlääbende si im ene Ghetto iigschlosse worde. Das isch am 4. Oktober 1941 gruumt worde und d Juude si uf Doodesmärsch uf Transnistrie driibe worde. 65'000 Jude hai vor em Chrieg z Kischinau gläbt und vo deene si 53'000 umchoo. Im August 1944 het die Rooti Armee Kischinau erooberet.

Noch em Zwäite Wältchrieg

Im Friidensverdraag vo Bariis vo 1947 het Rumänie anerkennt, ass Bessarabie Däil vo dr Sowjetunion sig, und Kischinau isch d Hauptstadt vo dr Moldauische Sozialistische Sowjetrepublik worde. Im Friide isch d Stadt wider ufbaut worde und isch vo 134'000 Iiwohner im Joor 1950 uf 676'700 Iiwohner im Joor 1991 gwaggse. Wo am 27. August 1991 d Moldau sich unabhängig vo dr Sowjetunion gmacht het und d Republik Moldawie usgrüeft worden isch, isch Kischinau d Hauptstadt vo dr nöje Republik worde.