Klara Honegger

D Klara Honegger (* 29. Mai 1860 z Züri; † 11. April 1940 au deert) isch e Schwyzer Fraueräächtleri gsii.

Lääbe

D Klara Honegger isch e Doochter vum Pedagoog Kaspar Honegger un syre Frau Rosalia geb. Hasler gsii.

Si het si zeerscht in dr Sittligkaitsbeweegig engaschiert, derno fir di bolitisch Glyychberäächtigung vu Fraue. Anne 1896 het si as Mitstryteri vu dr Emma Boos-Jegher zum Grindigskrais vu dr «Union für Frauenbestrebungen Zürich» gheert, wu si d Bresidänti dervu vu 1903 bis 1911 gsii isch. 1909 isch si Grindigsmitgliid im Schwyzerische Verband fir Frauestimmräächt gsii. Vu1904 bis 1921 isch si Redakteeri vu dr Zytschrift Frauenbestrebungen gsii, speeter au Redakteeri vum Schweizer Frauenblatt.

Bim Bund vu Schwyzerische Fraueverain (BSF), wu si 1899/1900 mitgrindet ghaa het, isch si ab 1905 im Voorstand gsii, vu 1911 bis 1916 as Bresidänti. 1914 het si bim Ufböu vu dr Zürcher Frauezäntraal mitgmacht.

Si isch em Religieese Sozialismus noogstande un het si 1915 dr Friidesbeweegig aagschlosse. Si isch Mitgliid vun eme «Frauenbund zur Förderung der internationalen Eintracht» un isch Grindigsmitgliid vum Schwyzerische Kumitee vu dr Internazionaale Fraueliiga fir Friide un Freihait (IFFF) gsii. Derzue isch si au langi Joor im Voorstand vu dr Schwyzerische Zäntralstell fir Friidesaarbet gsii. No 1933 het si in dr «Arbeitsgemeinschaft Frau und Demokratie» mitgschafft.

Literatuur

• Marthe Gosteli (Hrsg.): Vergessene Geschichte. Illustrierte Chronik der Frauenbewegung, 1914–1963. Stämpfli, Bern 2000, Bd. 2, S. 610.
• Regula Ludi: Honegger, Klara. In: Historisches Lexikon vo dr Schwiiz.

Fueßnote

Dä Artikel basiert uff ere fräie Übersetzig vu dere Version vum Artikel „Klara_Honegger“ vu de dütsche Wikipedia. E Liste vu de Autore un Versione isch do z finde.