Konrad zer Sunnen

Dialäkt: Baseldütsch

Dr Konrad zer Sunne isch e Baasler Achtburger, Oberstzumftmäister und Bürgermäister im 14. Joorhundert gsi.

Lääbe

Dr Konrad zer Sunne wird zum erste Mol 1355 erwäänt. Er isch dr Soon vom Werner Furnach und sinere Frau Agnes gsi. Dr Konrad het d Agnes Zibol ghürootet, d Dochder vom Jakob Zibol und Schwöster vom Burkhard Zibol. Er het e Bueb gha, dr Hug zer Sunnen, wo spööter dreimol Oberstzumftmäister worde isch.

Vo 1362 aa isch dr Konrad as Verdräter vo de Achtburger im Root vo Baasel gsässe. 1373 und 1396 isch er zum Oberstzumftmäister gweelt worde. Wil e hufe Baasler Aadligi im Sämpacherchrieg 1386 umchoo si, isch dr zer Sunne im Joor druf zum Bürgermäister gweelt worde, wo äigetlig us em Ridderstand hätt sötte choo. D Stadt Baasel het en mee as äimol as Gesandte zu Verhandlige gschiggt, u. a. wo d Stadt vor dr Schlacht bi Sämpach brobiert het, zwüsche de Habsburger und de Äidgenosse z vermiddle, und 1387-88 an Versammlige vom Schwööbische Stedtbund.

Dr Konrad zer Sunne isch zwüsche 1396 und 1398 z Baasel gstorbe.

Kwelle

• Stefan Hess: Zer Sunnen, Konrad. In: Historisches Lexikon vo dr Schwiiz.