Jakob Zibol

Dialäkt: Baseldütsch

Dr Jakob Zibol (* vor 1348; † 3. Merz 1414 z Baasel in dr Kartause) isch e Baasler Finanziee und Politiker am Ändi vom 14. und am Aafang vom 15. Joorhundert gsi.

Lääbe

Dr Zibol isch as Soon vom Kaufmaa Johans Zibol uf d Wält cho. Er isch zwäimol verhürootet gsi, vo dr erste Frau kennt mä dr Naame nid, die zwäiti, d Verena Sevogel, het er 1398 ghürootet. Dr Oberstzumftmäister Burkhard Zibol isch si Soon gsi. Si Dochder Agnes isch mit em Baasler Bürgermäister Konrad zer Sunne verhürootet gsi.

Politischi Karriere

Er isch zum Schlüssel zümftig gsi und isch 1368 und 1380 für sä im Root gsässe. Er isch e baar mol Oberstzumftmäister worde und isch zwüsche 1382 und 1408 e baar mol as Achtburger im Root gsässe. 1388 isch er zum Bürgermäister gweelt worde, 1408-09 isch er Sibner gsi, und er het d Stadt as Gsandte am Oberrhii und im Riich verdräte. Am 5. Oktober 1409 häi d Katharina vo Burgund und dr Herzog Friedrich IV. vo Östriich Baasel dr Chrieg erkläärt und d Ööstriicher häi churz druf Rhiifälde, wo denn im Zibol verpfändet gsi isch, im ene Handsträich iignoo. Baasel het dr Zibol as Verrööter verurdäilt und zur Stroof entäignet und är und sini Söön häi non e Buess vo 12'000 Gulde müesse zaale, wil si s Schloss Rhiifälde häige lo verjääse. Dr Jakob Zibol het alli Ämter und Würde verloore und isch ruiniert gsi.

Wirtschaftligi Karriere

Dr Zibol isch as Finanziee riich worde. 1396 isch er Pfandher vo dr vordere und middlere Burg Wartebärg und vom Dorf Muttez worde, 1404 vo Schänkebärg und 1405 vo dr Festig Rhiifälde.

Au in dr Stadt het er meereri Bsitz gha, wie dr Schalerhof am Rhiisprung. 1401 het er dr bischöflig Hoof im Chläibaasel im Kartüüserorde gschänggt, wo dört si Kloster gründet het.

Kwelle

• Samuel Schüpbach-Guggenbühl: Zibol, Jakob. In: Historisches Lexikon vo dr Schwiiz.