Kulturwäg Limmet

De Kulturwäg Limmet (früehner: Kulturwäg Bade–Wettige–Noiehof) isch en Kulturwäg entlang vo beidne Site vo de Limmat und isch im 1991i entschtande. Uf em Wäg vo de Holzbrugg über d Limmat vo Wettige uf Noiehof bis zu de Holzbrugg, wo d Altschtadz vo Bade mit em rächte Limmatufer verbindet, sind 22 Skulpture z gseh.

Entschtehig

Zum 700. Geburtstag vo de Eidgnosseschaft hei di Gmeinde Bade, Wettige und Noiehof en Usstellig vo Freilichtskulpture uf d Bei gschtellt. 18 Usschtelligsschtück hei d Gmeinde kauft und sind doderbi au vo Schponsore, em Kanton Aargau und em eidgnössische Bundesamt für Kultur unterschtützt worde. D Usschtellig isch schpöter um weiteri 3 Usschtelligsschtück erwiteret worde, so dass si hüt 21 Kunschtwerch umfasst.

De Wäg

Am linke Ufer vo de Limmat, grad an de Holzbrugg uf de Noiehofer Site, fangt de Kulturwäg aa. Derte gseht me d Raumwürfel vom Peter Hächler (1922–1999). Ursprünglich isch s Zimmer vom Beat Zoderer (*1955) s nächschti Kunschtwerch uf em Wäg gsi, es stoht aber im Momänt näbe de Leueschüür uf de Chloschterhalbinsle. We me de Wäg witer Richtig Webermühli lauft, chunnt me zum erschte Teil vo 3x Form vo de Lucie Schenker (*1943), dann zum Gespräch über den Fluss, wo uf beidne Siite vo de Limmat an de Gwaggelibrugg inschtaliirt isch. S nächschti Kunschtwerck isch d Skulptur am Wasser vom Roman Signer (*1938), wo grad bim Schteg über de Fluss bi de Webermühli z finde-n-isch. Uf em Schteg isch au de zweiti Teil vo de Lucie Schenker ihre 3x Form inschtalliirt. Am linke Limmatufer sind dann bis zum Auschteg vier Skulpture z gseh: Zwei Einsiedeleien vom Kurt Sigrist (*1943), Lichtung vo de Gillian White (*1939), Reflex vo de Mariann Grunder (*1926) und 10 gute Vorsätze vom Theodor Huser (*1950). Uf em Auschteg isch s Moiré-Objekt vom Werner Witschi (1906-1999) und kurz nach em Schteg e Skulptur vom Markus Zeller (*1961). S nächschti Werch isch dann erscht uf de Alte Holzbrugg bim Landvogteischloss, s Flussobservatorium vom Vincenzo Baviera (*1945). De Kulturwäg goht dann am rächte Limmatufer wider retour. Di nächschte Skulpture sind erscht z Wettige. In de Nöchi vom ehemolige Schlachthof sind zwüsche de Iisebahnbrugg und em Bahnhof Wettige d Weglager vom Toni Calzaferri (1947-1999), d Ruderbündel vom Hans Thomann (*1957) und d Dreieck-Steine vom Walter Haldemann (*1943) z gseh. S git bim Kulturwäg witeri sächs Skulpture, wo alli uf de Chloscherhalbinsle z finde sind. Rächst und links vo de Alberich-Zwyssigschtroos sind Kunschtwerch vo de Monika Kaminska (*1953) und em Gianfredo Camesi (*1940) ufgschtellt, wobi letzschteri Ciel-Terre-Ciel heisst. De Wäg goht dann Richtig Limmat abbe, zum Grossen Weib vom Rudolf Blättler (*1941) und dann entlang em Fluss, vorbi am Bildstock Wachstumslinie vom Anton Egloff (*1933) und em Steinring vom Heiner Richner (*1944) zum lätschte usgschtellte Kunschtwerch, wo vo de Ursula Hirsch (*1952) gschtaltet worde-n-isch. Bis zum Usgangspunkt vom Kulturwäg, de Holzbrugg zwüsche Wettige und Noiehof, sind es dann numme noch e paar Schritt, wo de dritti Teil vo de Lucie Schenker ihre 3x Form z gseh isch.

Immer wider git's am Kulturwäg au Noierige. So stoht sit em Mai 2011 zwüsche de alte Spinnerei und em Kunschtwerk vo de Ursula Hirsch es Werk vom Anton Egloff, wo Espace parole heisst und am 31. Augschte 2012 sind grad zwei noii Kunschtwerch iigweiht worde: Shatt-Al-Arab vom Thomas Galler, wo bim Steg bi de Webermühli inschtalliirt isch und Wenn ich nicht will, steh ich still vom Daniel Robert Hunziker an de Autobahnschtützmuur in de Nöchi vo de Gwagglibrugg.^[1]