Lechquällegebirg

f

Lechquällegebirg
Lage vum Lechquällegebirg (geel firighebt) in dr Oschtalpe Lage vum Lechquällegebirg (geel firighebt) in dr Oschtalpe
Blick uf Untere Wildgrubenspitze, Roggalspitze un Rhonspitze Blick uf Untere Wildgrubenspitze, Roggalspitze un Rhonspitze
Höchst Gipfel	Untere Wildgrubenspitze (2.753 m ü. A.)
Lage	Vorarlberg, Eschtrych
Deil vo	Nordtiroler Chalchalpe Nerdligi Oschtalpe
Iideilig noch	AVE: 3a SOIUSA: 21.II
Koordinate	47° 11′ N, 9° 59′ O47.1861111111119.9852753

p5

Relief vum Lechquällegebirg (S) mit komplettem Bregazerwaldgebirg (M) un em Weschtfligel vu dr Allgaier Alpe inklusive vu dr Allgaier Nagelflue-Schichtchämm (NO) mit dr Haupt-Naturruumgränze un Bärghechene (Legänd lueg Bildbschrybig)

Roti Wand

Blick uf Zürs un dr Trittkopf

Zürsersee, im Hintergrund Valluga un Roggspitze

Blick iber dr Spullersee un dr Rätikon mit Druseflue, Drei Türm, Zimba un Schesaplana

Lechquällegebirg, Blick ins Lechdal

Blick vu dr Madlochalp Richtig Oberlech

Blick vum Madloch Joch zum Spullerschafberg

Naturschutzbiet Gipslöcher, dr Biberkopf

Gipslecher am Oberlech, links s Karhorn, im Hintergrund mittig dr Biberkopf

Blick vu Stallehr uf di gäch Sidsyte vum Lechquällegebirg mit em 70 m hoche Mason-Wasserfall un dr Roggelskopf.

S Lechquällegebirg isch e chlaini Gebirgsgruppe vu dr Nerdlige Chalchalpe in dr Oschtalpe. S lyt zganz im eschtrychische Bundesland Vorarlberg un umfasst dr Oberlauf vum Lech mit syne Quällbäch in ere Huefyyseform un au s ober Groß Walserdal.

Umgränzig

Vu dr Alpestadt Bludaz verlauft d Gränze im Side an dr Alfenz im Kloschtertal lang bis zum Flexepass. Vu dert uus verlauft si im Oschte wyter am Zürsbach lang, wu z Lech in dr Fluss Lech mindet, bis zur Yymindig vum Krumbach. Dr Krumbach fiert d Gränze im Norde ufezues bis zum Hochtannbergpass. Vu dertgoht d Gränze am Seebach lang iber Schröcke un wyter an dr Bregazer Ach lang bis uf Au un zur Yymindig vum Argebach, derno dr Argebach duruuf bis churz vor Damüls un wyter am Faschinabach lang im Weschte bis zum Faschinajoch. Vu dert uus goht s aabe ins Groß Walserdal un an dr Lutz lang bis zue dr Yymindig in d Ill, wu zurg zue dr Alfenzmindig z Bludaz fiert.

Dr Flexepass verbindet s Lechquällegebirg mit dr Lechtaler Alpe. Dr Hochtannbergpass bildet d Verbindig zue dr Allgaier Alpe un s Faschinajoch d Verbindig zum Bregazerwaldgebirg.

Wichtig fir d Definition un d Umgränzig vum Lechquällegebirg isch dr Walther Flaig gsii, e Alpinfierer un Autor vu Vorarlberg. Dr vu ihm gschaffe Name und Yydailig sin fir d AVE ibernuu wore.

S Lechquällegebirg gränzt an die andere Gebirgsgruppe vu dr Alpe:

• Bregazerwaldgebirg (im Norde)
• Allgaier Alpe (im Nordoschte)
• Lechtaler Alpe (im Oschte)
• Verwallgruppe (im Side)
• Rätikon (im Sidweschte)

Untergruppe

Dr Alpeverainsfierer Lechquellengebirge dailt d Gebirgsgruppe in die Untergruppe uf:

• Zitterklapfengruppe (bis 2403 m) mit Hochkünzelgrat (bis 2397 m)
• Gruppe vu dr Braunarlspitze (bis 2649 m)
• dr Mohnenfluhgrat am Tannberg (bis 2542 m)
• d Karhorngruppe am Hochtannberg (bis 2416 m)
• Johannesgruppe im Diesner un Gadner Schröf (bis 2573 m)
• dr Stafelvedergrat im Großwalsertal (am Breithorn 2081 m)
• d Kloschtertaler Gamsfreiheit (bis 2211 m)
• d Formarin-Schafberggruppe (bis 2413 m)
• d Gruppe vu dr Rote Wand am Formarinsee (bis 2704 m)
• dr Saladinagrat uf Formarin (Fensterlewand: 2329 m)
• d Gehrengratgruppe an dr Lechquälle (Pöngertlekopf un Pfafferneck: 2539 m)
• d Spuller Schafberggruppe (bis 2679 m)
• d Gruppe vu dr Wildgrubenspitzen (bis 2753 m)
• dr Erzberggrat am Kloschtertal (Wasenspitze: 2665 m)

Gipfel

Di 10 hegschte Gipfel vum Lechquällegebirg:

• Untere Wildgrubenspitze, 2.753 m ü. A.
• Rote Wand, 2.704 m ü. A.
• Großer Grätlisgrat, 2.702 m ü. A.
• Mittlere Wildgrubenspitze, Ostgipfel, 2.696 m ü. A.
• Mittlere Wildgrubenspitze, Mittelgipfel, 2.695 m ü. A.
• Rote Wand, Ostgipfel, au Jungferngipfel gnännt, 2.688 m ü. A.
• Nadel, 2.685 m ü. A.
• Spuller Schafberg, 2.679 m ü. A.
• Roggalspitze, 2.673 m ü. A.
• Wasenspitze, 2.665 m ü. A.

Anderi Gipfel vum Lechquällegebirg, wu mer chännt, gornet no ire Hechi:

• Grubenjochspitze, 2.659 m ü. A.
• Braunarlspitze, 2.649 m ü. A.
• Hochlicht, 2.600 m ü. A.
• Weschtlige Johanneskopf, 2.573 m ü. A.
• Omeshorn, 2.557 m ü. A.
• Mohnenfluh, 2.542 m ü. A.
• Pöngertlekopf un Pfaffeneck, beedi 2.539 m ü. A. (Doppelkuppe)
• Karhorn, 2.416 m ü. A.
• Formarin-Schafberg, 2.413 m ü. A. (weschtli vum Formarinsee)
• Zitterklapfen, 2.403 m ü. A.
• Hochkünzelspitze, 2.397 m ü. A.
• Zuger Hochlicht 2.371 m ü. A.
• Fensterlewaqnd, 2.329 m ü. A.
• Roggelskopf, 2.284 m ü. A.
• Feuerstein, 2.271 m ü. A.
• Warther Horn, 2.257 m ü. A.
• Wiißes Rössle, 2.214 m ü. A.
• Gamsfreiheit, 2.211 m ü. A.
• Breithorn, 2.081 m ü. A., oschtnordeschtli vum Fraßen
• Breithorn, 2.009 m ü. A., sideschtli vum Fraßen
• Hoher Fraßen, 1.979 m ü. A.

Bäss un Ibergäng

Ußer dr ufzellte Bäss, wu s Lechquällegebirg mit dr Nochbergruppe verbinde, git s innerhalb vum Lechquällegebirg kai Ibewrgang, wu mer mit em Pkw cha driber fahre.

Turistisch wichtig Ibergäng sin unter anderem

• Rauhes Joch (1918 m, bi dr Fryburger Hitte, 1.931 m ü. A., vu Oschte iber Fahrwäg, Iberquerig au mit em Mountainbike)
• Spullersee (1.827 m ü. A., Ibergang vum Lechtal ins Kloschtertal)
• Stierlochjoch (2.011 m ü. A., Zuegang us em Lechtal zur Raveschburger Hitte)
• Gamsboden (Standort vu dr Geppenger Hitte, 2.245 m ü. A., wyti Karschtlandschaft, Ibergang vum Lechtal ins Groß Walsertal)

Geology

Ähnli wie di nerdlige un eschtlige Nochberbiete zaichnet si s Lechquällegebirg uus dur e großi geologischi Vylfalt. S Gschtai, wu vorherrscht, isch Chalch (Oberrätchalch), mit große Vorchuu an vercharschtete Flechene. Dernäbe cheme au no Hauptdolomit vor un Fläckemergel un Mergel vum Lias.

Landschaft

Landschaftli wird s Lechquällegebirg bregt vum Gegesatz zwisch em ender schläne, no Nordoschte gnaigte obere Lechtal, wu zue dr Donau entwässeret, un dr diefe un zum Dail gäche Däler, wu zum Rhy zues entwässere un wu s Wasser in e Hufe Wasserfäll iber gäche Stafple aabegheit. D Wasserschaide verlauft huefyysefermig um d Lechquälle ume, un s greßer Gfäll zum Rhy fiert derzue, ass (in geologisch relativ churze Zytryym) all mee Bäch vum Rhy aazapfz wäre un dodermit d Wasserschaide alsfurt gege d Lechquälle zues verschobe wird.

Di huefyyefermig Wasserschaide drait au di hegschte Gipfel, doderby gheit d Gipfelflur vu Sidoschte no Nordweschte gege dr Breagazer Wald ab.

S Klima vu dr Region isch niderschlagsrych un chiel, d Bärg sin seli schneerych un ylmol no bis in Hochsummer schneedeckt. Wäge däm het s do zwee chlaini Glätscher in ere uugwehndli nidere Hechelag: dr Hochglätscher an dr Braunarlspitze un dr Glätscher an dr Rote Wand in Hechene unter 2700 m NN. Derzue het s an dr Untere Wildgrubenspitze un dr Flexespitze Yysräscht vu eemolige Glätscher, wu zum große Dail im Schutt vergrabe sin un wäge däm nume arg langsam abschmilze. D Gegnig isc im Winter ideal zum Skifahre.

Baim het s ender wenig. Dominiere dien Fohre, Bärg-Fohre un di gege Lawine seli reschistänte Grien-Erle. D Waldgränze lyt nidrig, bi eppe 1.700 bis 1.800 Meter. Verainzelt wagse Baim bis eppe 1.900 Meter.

D Däler sin vu Walser bsidlet wore. Historisch dominiert d Alpwirtschaft, hite dr Turismus, vor allem dr Skiturismus z Lech un dr chlainere Ortschafte Zürs, Stuben un Damüls.

Naturschutz

S Biosphärereservat Großes Walsertal umfasst au Dail vum Lechquällegebirg. Bsundersch inträssant sin d Chärnzone, w uno dr Vorgabe vu dr UNESCO Bstanddail vu jedem Biosphärereservat mien syy. Im Lechquällegebirg het s zwoo greßeri Chärnzone, s Gadetal un s Biet Faludriga Nova. D Gebirgswälder in däne Chärnzone wäre syt e baar Johr nimi forschtwirtschaftli bruucht. Doderdur biete die Chärnzone scho hite s in dr Nerdlige Chalchalpe sälte wore Bild vu naturnoche Gebirgswälder mit Baim in dr unterschidligschte Altersklasse un eme hoche Dotholzaadail.

Im Lechquällegebirg git s die Naturschutzbiet:

• Gadetal, yygrichtet 1987, Flechi 1.336 ha
• Gipslöcher Oberlech, yygrichtet 1988, 21 ha
• Bödener Magerwiesen, yygrichtet 1991, 16,5 ha
• Faludriga Nova, yygrichtet 2003

Pflanzeschutzbiet:

• Körbersee, yygrichtet 1958, 451 ha

Natura-2000-Biet:

• Bergwälder Kloschtertal
• Gadetal, yygrichtet 1995, Fleche 1.543,8 ha

Turismus

Di (mautpflichtig) Nutzig vu Hechestroße erlaubt s, mit em Auto in s Inner vum Gebirg bis uf e Hechi vu fascht 2000 Meter z chuu. S git aber au Biet, wu zimli abgschide vum Verchehr sin.

Ufschließig

S Lechquällegebirg isch wenig turistisch ufgschlosse, wämer mol vun e baar Skilift un Bahne diräkt bi Lech un Zürs absiit. In d Däler fiere schmali Mautstroße, vu Lech het s im Summer ne Pändelbusverchehr an d Lechquälle. Dergege isch s Gebirg ideal firs Wandere ufgschlosse dur Bärghitre, wu dur e Hechewäg verbunde sin. Är folgt em ganze „Huefyyse“ vu dr Gipfel, mer bruucht aber – zmindescht bis zum Aafang vum Hochsummer – alpini Erfahrig.

Noch em Sidrand vum Lechquällegebirg chunnt d Weschtrampe vu dr Arlbergbahn. Dr Strom derfir wird mit Wasserchraft us em ufgstaute Spullersee gwunne, wu 700 Meter hoch iber em Kloschtertal im sidlige Dail vum Lechquällegebirg lyt.

Hitte vum Alpeverain

Fryburger Hitte

Im Lechquällegebirg git s fimf Alpeverainshitte:

• Biberacher Hitte 1.842 m ü. A.
• Fraßehitte 1.725 m ü. A.
• Fryburger Hitte 1.931 m ü. A.
• Geppenger Hitte 2.245 m ü. A.
• Raveschburger Hitte 1.948 m ü. A.

Die Hitte sin, mit Uusnahm vu dr Fraßehitte, Dail vu dr Lechquällerundi.

Färn-/Wytwanderwäg

Aafang vum Lechwäg

Blick vu Sidweschte, vum Amatschonjoch, uf s Lechquällegebirg. Links vu dr Mitti dominant di Rot Wand.

Dr Nordalpewäg (Eschtrychische Wytwanderwäg 01) goht eso dur s Lechquällegebirg:

• D Dailstrecki 17 verlauft vu Zürs uf Damüls iber s Madlochjoch, d Raveschburger Hitte, d Fryburger Hitte, d Geppenger Hitte un d Biberacher Hitte. Dr letscht Abschnitt vum Faschinajoch uf Damüls isch scho im Breagazerwaldgebirg.

D Via Alpina, e Wytwanderwäg, wu iber d Gränze mit fimf Dailwäg dur di ganze Alpe goht, verlauft au dur s Lechquällegebirg.

Dr Rot Wäg vu dr Via Alpina verlauft mit drei Etappe eso dur s Lechquällegebirg:

• Etappe R52 vu dr Mindelheimer Hitte uf Schröcken, zum greßere Dail in dr Allgaier Alpe gläge; zwisch em Hochtannbergpass un Schröcken verby am Kalbelesee un Körbersee verlauft dr Wäg aber scho dur s Lechquällegebirg
• Etappe R53 vu Schröcken uf Buchboden iber dr Schadonapass (Biberacher Hitte)
• Etappe R54 vu Buchboden uf St. Gerold (dr zweet Dail vu däre Etappe isch sho im Breagazerwaldgebirg)

Dr Lechwäg fangt am Formarinsee aa un fiert iber 125 km zum Lechfall uf Füssen.

D Lechquällerundi goht vu dr Biberacher Hütte zur Raveschburger Hitte (optional zur Stuegerter Hitte).

Chlätterstaig

• Chlätterstaig am Karhorn (2416 m)
• Panorama-Chlätterstaig
• Francesco Tarmann-Chlätterstaig (Ludesch)

Panorama

360° Gipfelpanorama vum Zitterklapfe (2.403 m)

Literatur

• Dieter Seibert: Bregenzerwald- und Lechquellengebirge. Alpenvereinsführer alpin. 1. Auflage. Bergverlag Rother, München, ISBN 978-3-7633-1095-1. 

Weblink

 Commons: Lechquellengebirge – Sammlig vo Multimediadateie

• Alpe-Panorama vum Formarin-Seekopf 2084 m

Dä Artikel basiert uff ere fräie Übersetzig vu dere Version vum Artikel „Lechquellengebirge“ vu de dütsche Wikipedia. E Liste vu de Autore un Versione isch do z finde.