Limmat Verlag
Dr Limet Verlag isch e Buechverlag z Züri.
Er isch am 19. März 1975 entstande. S Undernääme isch als Gnosseschaft organisiert.
Wo dr Zürcher Sozialischt Theo Pinkus (1909–1991) sys Buech Schweizerische Arbeiterbewegung. Dokumente zu Lage, Organisation und Kämpfen der Arbeiter von der Frühindustrialisierung bis zur Gegenwart het welle usegää, isch das bi de Verlääg won er agfrooget het abgleent woorde. Do het dr Pinkus sälber syn eigete Verlag gründet, und das isch eb e dr Limet-Verlag woorde.
Bi däm Huus sind Wäärch zu dr Gschicht, zu politische Frooge, grad au zu heikle Theeme vo dr Schwiizer Politik, zu dr Arbeiterbewegig und bsunders au zu dr Frauegschicht usechoo. En eigeti Sparte sind Biografie. Bi de Sachbüecher sind d Bildbänd zu dr Gschicht vo dr Fotografy i dr Schwiiz e groossi Gruppe; es paar vo dene sind als Publikazioone zu groossen Uusstelligen usechoo.
Mit dr Zyt het dr Verlag es literarischs Programm ufbout, mit de Schrifte vo Autoore us dr Schwiiz, veräinzelt au mit Wäärch in ere Düütschschwiizer Mundart. E Dialäkt-Blüetelääsi vo 2007 heisst Igajanumenechligalose. Für d Lyrik isch d Reie „undeklarierte“ doo. Immer meh sind au Übersetzige i verschidene Sprooche im Verlagsprogramm, und dr Verlag het bsunders au druf glueget, Sache vo dr rätoromanische Literatur is Programm ufznää. Zu dr vilsproochige Schwiiz isch es originells Verlsgsprojäkt das mit em Buech Mutter, wo übernachtet die Sprache? 14 Porträts mehrsprachiger Autorinnen und Autoren in der Schweiz: Melinda Nadj Abonji, Arno Camenisch, Wen-huei Chu, Simon Froehling, Zsuzsanna Gahse, Dmitrij Gawrisch, André Vladimir Heiz, Daniela Janjic, Saïda Keller-Messahli, Ingrid Lukas, Marius Danie vo ane 2010 gsy.
Bi den Autoore vom Limet-Verlag sind öppe:
- d Mundartdichterin Anna Maria Bacher
- dr Max Frisch
- d Else Lasker-Schüler
- dr Meinrad Inglin
- dr Charles Ferdinand Ramuz
- d Anne Cuneo
- d Anna Felder
- dr Federico Hindermann
- d Ute Kröger
- dr Alberto Nessi
- dr Friedrich Glauser
- d Agnes Mirtse
- dr Niklaus Meienberg
- dr Giorgio Orelli
- dr Fabio Pusterla
- dr Franz Hohler
- d Laure Wyss
- dr Emil Zopfi