Luddi

Luddi (aigeni Schryybwyys: LUDDI) isch e Rockband us em Schwaarzwald, wu sälber gschriibeni Lieder uf Alemannisch spiilt.

Gschiicht

Luddi isch um d Brieder Manuel un Christopf Dörflinger vu Birchedorf entstande. Di beede un di andere drei Bandmitgliider, dr Jürgen Schmidt, dr Thilo Rebmann un dr Simon Frommherz, chänne si, syter as si Chinder gsii sin und hän friejer zäme in dr Draachtekapäll Birchedorf gspiilt.

Ire eerscht Ufdritt as Rockband hän si am 25. April 2002 vor Schueler*ne vum Klettgau-Gimnasium z Düenge im Rame vum 50-jehrige Landesjublieum vu Baade-Wiirtebäärg ghaa. Scho im eerschte Johr hän si au ire eerscht Album „FÜÜRIOO“ uusebrocht.

Stilistisch spiile si ne Mischig us Rock, Blues, Brass, Funk un Ballaade. Im Lauf vu dr Johr hän si Hunderti vu Ufdritt z Baade-Wiirtebäärg, aber au in dr Schwyz un z Frankryych ghaa.

Anne 2005/2006 hän si bim Gerhard-Jung-Wettbewäärb mitgmacht und en erschte Bryys in dr Kategory Lied gwunne. Im Johr 2014 hän si bim renommierte Chlaichunschtbryys Baade-Wiirtebäärg en Feerderbryys iiberchuu.

Bandmitgliider

Manuel Dörflinger, Gsang, Gitarre, Mandoline & Trompete
Christoph „Chris“ Dörflinger, Gsang, Saxophon, Klarinette & Akkordeon
Jürgen „Mad“ Schmidt, Gitarre
Thilo „Tiffler“ Rebmann, Schlagzeug & Gsang
Simon Frommherz, Posaune & Percussion

Mänkmol spiilt au dr Martin Bürger am Bass as „Verstärkungs-LUDDI“ mit.

Albe

Uf hoher See (LIVE). 2020
ReTour de France (LIVE). 2019
Wieberschmöcker (LIVE). 2016
Annemarie. 2014
Hauptsach gsund. 2011
Terminal 3. 2007
Halbi Händsche. 2005
FÜÜRIOO. 2002

Uuszaichnige

Gerhard-Jung-Bryys 2006
Goldener Tourio fir „Birkendorfer Hagehole“ 2007
2. Blatz bim Wettbewärb Alemannerock grenzelos
Chlaichunschtbryys Baade-Wiirtebäärg 2014

Weblink

Websyte vu LUDDI
Bianca Flier: Mal hart, mal zart, Badische Zeitung, 16. Septämber 2019