Alemannerock grenzelos
Unter em Titel Alemannerock grenzelos – Mir sueche die Beschte het d Muettersproch-Gsellschaft anne 2007 e Wettbewäärb fir Musikgruppe uusgschriibe, wu Rockmusik uf Alemannisch mache.
Wettbewäärb ändere
Dr Wettbewäärb isch im April 2007 uusgschriibe woore. S hän Gruppe vu Siidbaade, us em Elsiss, us dr Schwyz, vu Vorarlbärg un vu Liachtaschtaa chenne mitmache, wu Rock, Pop, Hip-Hop oder ebis Ähnligs mache. Nit mitmache chenne hän Ainzelinterpreete, A-cappella-Gruppe oder Liedermacher. S isch dr eerscht Wettbewäärb vu dr Muettersproch-Gsellschaft fir Rockgruppe gsii. Bis zum 15 Juli 2007 het mer e Sach chenne yyschicke.
Zum Wettbewäärb hän insgsamt sächzee Gruppe ebbis yygschickt, aacht vu Dytschland, drei us em Elsiss, drei us dr Schwyz, aini vu Liachtaschtaa un aini vu Vorarlbärg. E Vorjury het derno us dääne säächzee Gruppe vier uusglääse, wu zum Finaal am 5. Oktoober 2007 uf Oberried yyglaade woore sin:
- Luddi, vu Siidbaade
- booze, us dr Schwyz
- Alldra, vu Vorarlberg
- Made in Elsass, us em Elsiss
Im Finaal hän si ne halbstindig Brogramm vor Publikum mieße live uf dr Bihni bresäntiere. Moderiert het s Finaal d Barbara Scherrer vum SWR.
E Jury het derno d Gwinner uusglääse. In dr Jury vum Wettbewäärb sin die Lyt gsii:
- Franz-Josef Winterhalter, dr Bresidänt vu dr Muettersproich-Gsellschaft
- Ulrike Derndinger, e alemannischi Autori
- Gero Herr, en alemannische Liedermacher
- Raimund Sesterhenn, fir d Jazz- un Ropcjschuel Fryburg
- Friedel Scheer-Nahor, Mitarbaiteri vum Badische Werterbuech un Gschäftsfiereri vu dr Muettersproch-Gsellschaft
Gwäärtet woore isch dr kreatiiv Umgang mit em Alemannisch, d Originaliteet un dr musikaalisch Qualiteet. As Bryys het s 1500 € fir dr eerscht Blatz gee, 1000 € fir dr zweet Blatz un 500 € fir dr dritt Blatz. Gsponseret woore isch där Wettbewäärb vum REGIO-Magazin, vum Sparkasse-Verband Baade-Wiirttebäärg, vu dr Badenova un vu dr Sparkasse Hochschwarzwald, un au d Muettsproch-Gsellschaft het no Gäld derzue glait. D Jury het derno die Raiefolg bstimmt:
- 1. Blatz – booze
- 2. Blatz – Luddi
- 3. Blatz – Alldra
- 4. Blatz - Made in Elsass
Literatur ändere
- Friedel Scheer-Nahor: Alemannisch rockt sichs prima. In: Alemannisch dunkt üs guet III/IV 2007, S. 24-27 (Online)
- Michael Martin: Rock auf Alemannisch, Badische Zeitung, 9. Oktober 2007