Dr Konsul Marcus Claudius Marcellus

Dr Marcus Claudius Marcellus (* um 268 v. d. Z.; † 280 v. d. Z. bi Venusia) isch äine vo de römische Generääl im Zwäite Punische Chrieg gsi, het Syrakus erooberet und isch e baar mol zum Konsul gweelt worde.

Noch em Poseidonios[1] sig er dr erst in sinere Familie gsi, wo s Cognomen Marcellus gha het, was aber nit richdig isch.

Dr Marcellus het uf Sizilie gegen e Hamilkar Barkas kämpft und als Konsul im Joor 222 v. d. Z. (zämmen mit em Gnaeus Cornelius Scipio Calvus) in Gallie gege d Insubrer, und het d spolia opima zum dritte und letschte Mol in dr römische Gschicht gwunne, wil er dr gegnerisch Aafüerer Viridomarus oder Virdumarus döödet het.[2]

Im Joor 216 v. d. Z., noch dr Niiderlaag vo Cannae, het er in Canusium s Kommando über d Räst vo dr Armee übernoo und het Nola und s südlige Kampanie grettet. Er het aber nüt chönne mache drgeege wo Capua zum Hannibal überglofe isch. Noch eme Suffektkonsulat im Joor 215 v. d. Z. isch er im Joor druf as Konsular in Sizilie gsi wäärend em Ufstand vo Syrakus; er het Leontini gstürmt und Syrakus belaageret, wo dank em Archimedes sich lang het chönne verdäidige. Noch zwäi Joor het er d Stadt erooberet, au wenn d Punier iire Versterkig gschiggt häi. Er het d Iiwooner lo lääbe, het aber d Kunstschetz uf Rom mitgnoo. Das isch denn spööter immer eso gmacht worde.

Im Joor 210 isch er wider Konsul gsi, und het Salapia in Apulie iignoo, wo sich die Stadt gegen e Hannibal erhoobe het und het die numidischi Garnison lo dööde. As Prokonsul het er 209 dr Hannibal bi Venusia aagriffe, het sich aber denn in d Stadt zruggzooge. Mä het en aaklagt, ass er käi guete Füerer sig und er het d Drubben dört gloo und isch elläi zrugg uf Rom, zum sich go verdäidige.

In sim fümfte und letschte Konsulat im Joor 208 v. d. Z. si är und si Mitkonsul Titus Quinctius Crispinus in dr Nööchi vo Venusias aagriffe worde und dr Marcellus isch umchoo. Dr Titus Livius het mit sine Erfolgsgschichte über en e chli überdriibe, aber dr Naame „s Schwärt vo Rom“, wo men em gee het, isch mee as verdient gsi.

Weblingg ändere

Fuessnoote ändere

  1. Bim Plutarch, Marcellus 1.
  2. Polybios 2, 34; Titus Livius, epitoma 20; Properz 4, 10, 39–41.
  Dä Artikel basiert uff ere fräie Übersetzig vum Artikel „Marcus_Claudius_Marcellus_(Feldherr)“ vu de dütsche Wikipedia. E Liste vu de Autore un Versione isch do z finde.