Marga Vogel

D Marga Vogel (* 15. Mai 1892 z Schopfe; † 5. Oktober 1968 uf dr Richenau) isch e dytschi Haimetdichteri gsii. Mer chännt si wäge ihre alemannische Gedicht, wu churz vor ihrem Dod in eme Biechli publiziert wore sin.

Lääbe

D Vogel isch e Dochter vum Josel Vogel, eme Handwärcher vu Schännau, un dr Marie Vogel geb. Schwarz vu Marzell gsii un as ainzig Chind vun ene z Schopfe ufgwagse un uf Schuel gange.

No dr Schuel het si z Wiesbaden e Lehr as Chindergärtneri gmacht un isch derno uf Frankrych, an Gämfer See gange go Franzesisch leere. Bis zum Uusbruch vum Erschte Wältchrieg het si druf z Ängland as Erzieri in ere Familie gschafft. Im Chrieg het si as Rot-Chryz-Schweschter in verschidene Frontlazarett gschafft. Noch em Chrieg het si z Griecheland wider as Erzieri in ere Familie gschafft. Vu 1928 bis 1952 isch si schließlig Oberi vum Chraisaltershaim z Rhywyler gsii. Im Zweete Wältchrieg isch s Haim zwaimol evakuiert wore. Iber die Zyt het si in dr Zytschrift Die Markgraftschaft unter em Titel Kleine Odyssee am Oberrhein brichtet. As Räntneri het si zerscht z Chrozige un schließli z Rhyfälde gläbt.

D Vogel het si scho as jungi Frau fir di Alemannische Gedicht vum Johann Peter Hebel inträssiert. Wu im Mai 1910 z Mille ne Hebel-Dänkmol yygweit woren iosch, het si dert Grieß us em Oberland mit eme aigene Gedicht uf Alemannisch brocht. Si het uf Hochdytsch un uf Alemannisch gschribe, Gedicht un au Prosa. Anne 1956 isch unter em Titel Herz auf Bewährung e stark autobiografisch bregti Verzellig us dr Zyt vor em Erschte Wältchrieg uf Hochdytsch uusechuu. Si isch um die Zyt au as Dialäktdichteri in dr Region bekannt wore, anne 1959 isch si au mol bi aire vu dr „Oberrheinische Dichterlesungen“ gsii, wu dr Hubert Baum organisiert ghaa het. Zue irem 70. Geburtsdag het dr Sidweschtfunk anne 1962 e Sändig iber sii mnit ere as Gascht gmacht. Dr Hubert Baum het ire Gedicht Alte, guete Rot in sy Anthology Freude am alemannischen Gedicht (1968) ufgnuu un e Interpretazion derzu gschribe. Aigetli hätte iri alemannische Gedicht in dr Silberdistel-Reihe im Verlag Moritz Schauenburg sotte uusechuu, aber s isch us iregdeme Grund nie doderzue chuu, wäge däm het si s Biechli Alemannische Gedichte anne 1968 im Schopfemer Verlag Georg Uehlin vereffetligt.

Am 5. Oktober 1968 het d Vogel d Auge fir immer zuegmacht. Si isch im Grab bi imre Unkel Rudolf Vogel, em ehmolige Oberburgermaischter vu Rhyfälde, vergrabe wore.

Wäärch

• Herz auf Bewährung. Erzählung. 1956
• Kleine Odyssee am Oberrhein. In: Die Markgrafschaft. Nr 6/7, Jg. 1961
• Alemannische Gedichte. Vorwort von Pfarrer Mennicke. Georg Uehlin, Schopfheim 1967

Literatur

• Rüdiger Hoffmann: Marga Vogel. Zum 100. Geburtstag der Dichterin. In: Das Markgräflerland: Beiträge zu seiner Geschichte und Kultur. 55.1993, Heft 1.1993: 147−153 (Digitalisat)

Weblink

• Marga Vogel uf LEO-BW
• d Marga Vogel uf em Wiesentäler Alemannenweg
• Täxtprobe bi dr Muettersproch-Gsellschaft