Modärni Kunst isch e zimlig unscharfe Begrif, wo aber in dr Umgangssprooch vil brucht wird, für die avantgardistischi Kunst vom 20. Joorhundert.

Im Picasso si Dejeuner sur l'Herbe z Stockholm

In dr Fachsprooch reedet mä hüte eender vo dr Kunst vo dr Modärne, zum dr Begriff klaarer vom Begriff Zitgenössischi Kunst abgränze.

Sit de 1970er Joor isch d Modärne-Postmodärne-Diskussioon immer hitziger worde und es git underschiidligi Uffassige drüüber, öb die Zitgenössischi Kunst no zur Modärne ghöört oder nid, oder öb mä äinzelni zitgenössischi Ströömige zur Modärne söll zelle und anderi zur Postmodärne. Das hangt au stark drmit zämme, wie dr Begriff Modärne definiert wird, d. h. was für e Konzept d Modärne söll haa.

Iiordnig ändere

In Bezug uf die illusionistischi Bildkonzepzioon, wo no im 19. Joorhundert verhaftet isch, wiist scho dr Impressionismus mit siner Moolwiis und Farbgstaltig uf die modärni Kunst aane, wie au um 1900 dr Jugendstil mit siner dekorative Ornamäntik.

Äidütiger het aber dr Expressionismus mit dr bishäärige Kunst broche: Uf Choste vo dr Perspektive und vo dr realistische Widergoob vom Motiv het s subjektive Erlääbe sölle daargstellt wärde, wie mä s in de Wärk vom Vincent van Gogh, Paul Gauguin, Paul Cézanne, Edvard Munch und bi de Künstlergrubbe vo de Foowiste, Brücke, dr Nöije Künstlerveräinigung Münche (N.K.V.M.) oder dr Redakzioon vom Der Blaue Reiter cha gsee. Bis in d 1950er Joor het dr Expressionismus in dr Art Brut und im Daschismus si Wirkig zäigt. Dr Stil vo dr Nöije Sachligkäit het neoexpressionistische Pathos gha, unter anderem in Wärk vom Otto Dix, George Grosz und Christian Schad, wo realistischi Daarstellig zum Däil mit ere satirische Gsellschaftskritik verbunde häi. 1916 isch dr Dadaismus entstande, die ersti Anti-Kunstbeweegig vo dr Avantgarde, as Brotest gege die etablierti Kunst.

Die abstrakti Moolerei in iire verschiidene Stilrichdige stoot exemplarisch für en Übergang zun ere modärne Kunst. Us iire häi sich denn so verschiideni Richdige entwicklet wie Pop Art, Minimal Art, Neue Wilde, aber au Häppening, Fluxus, Land Art, die soziaali Kunst vom Joseph Beuys, Wolf Vostell und de Situazioniste und d Konzeptkunst.

Kontroverse ändere

Die modärne Kunst isch zerst im Mainstream immer wider uf Widerspruch gstoosse. Es isch äinzelne Sammler z verdanke, ass Künstler gförderet worde si. E Höhepunkt in dere Usenandersetzig isch d Usstellig „Entarteti Kunst“ gsi, wo d Nazionaalsozialiste din Wärk vo dr modärne Kunst as „entartet“ präsentiert häi. Dr offizielli Kunstbegriff het alli abstrakte und modärne Tendänze verdammt und dr Kunst klaari Ufgoobe gee. Bis hüte wird modärni Kunst von gwüsse konservative Kräis abgleent, wo eender en antike oder klassische Kunstbegriff verdräte.

Litratuur ändere

  • David Britt: Modern Art - Impressionism to Post-Modernism. Thames & Hudson, London 2007, ISBN 978-0-500-23841-7
  • Rauterberg, Hanno: Und das ist Kunst?!  −  Eine Qualitätsprüfung, S.Fischer Vlg., Frankfurt am Main 2007, ISBN 978-3-10-062810-7, 304 S.
  • Saehrendt, Christian/ Kittl, Steen T.: Das kann ich auch  −  Gebrauchsanweisung für moderne Kunst, DuMont Literatur und Kunstverlag Köln 2007, ISBN 978-3-8321-7759-1, 248 S.
  • Völker, Wolfram (Hg.): Was ist gute Kunst?, Hatje Cantz Verlag, Ostfildern 2007, ISBN 978-3-7757-1976-6, 167 S.

Weblingg ändere

  Commons: Contemporary art – Sammlig vo Multimediadateie
  Commons: Modern_art – Sammlig vo Multimediadateie
  Dä Artikel basiert uff ere fräie Übersetzig vu dere Version vum Artikel „Moderne_Kunst“ vu de dütsche Wikipedia. E Liste vu de Autore un Versione isch do z finde.