Neleide

D Neleide (altgriech. Νελεῖδαι, Neleidai) sind i de griechische Mythologii d Noofaare vom König Neleus gsii. De älteri Zwiig stammt vom Periklymenos ab und hend e zittlang as König öber Athen regiert und zodem no die ionische Stedt z Chliiasie a de Chüste vo de Ägäis gründt. De jüngeri Zwig stammt vom Nestor ab. Meriri historischi Gschlecht vo Athen hend sich as Noofare vo de Neleide bitrachtet.

Söö vom Neleus

De Neleus hett mit de Chloris zwölf Söö und ai Töchter ghaa. Ali Söö, mit Uusnam vom Nestor, wo de jüngst gsii isch, sind vom Herakles töödt wore. Nume vom Periklymenos, em ältiste, und vom Nestor, em jüngste sind Noofaare bikannt. De Homer kennt nebet dene zwee no de Chromios und d Töchter Pero.

D Näme vo de Söö sind bim Apollodor die: Periklymoenos, Nestor, Tauros, Asterios, Pylaon, Deimachos, Eurybios, Epilaos, Phrasios, Eurymenes, Euagoras und Alastor. De Chromios werd nöd gnennt.

Noofaare vom Nestor

De Nestor het sibe Söö ghaa und zwoo Töchtere. D Neme vo de Söö sind: Thrasymedes, Antilochos, Aretos, Echephron, Perseus, Peisistratos und Stratios, d Töchtere haisset Polykaste und Peisidike. De ältist Soo isch de Antilochos, wo zäme mit sim Vatter und sim Brüeder Thrasymedes in Troianische Chrieg zogen isch. Nochem Chrieg isch er hail uf Pylos zruggchoo, de Antilochos aber isch im Chrieg umchoo. Wer vo de Söö vom Nestor König vo Pylos woren isch, isch nöd bikannt.

Noofaare vom Periklymenos

Wo d Heraklide i d Peloponnes iigfalle sind, sind d Neleide uf Athen ggange und de Melanthos, de Soo vom Andropompos, Soo vom Penthilos, Soo vom Boros, Soo vom Periklymenos isch König vo Athen wore.. Nochem Tood vom Melanthos isch de Kodros isch de letscht König vo Athen gsii. Siim ältiste Soo Medon söll de ersti Archon vo Athen gsii sii und er isch de Stammvatter vo de Medontide. Di andere Söö vom Kodros sind mit Koloniste öber d Ägäis gfaare und hend a de Chüste vo Chliiasie die ionische Stedt gründet. De Neileos hett mit sim Soo Aipytos noch de Saag Milet kolonisiert und Priene, de Kyaretos oder Kydrelos d Stadt Myus, de Androklos Ephesos und d Insle Samos, de Damasichthon und Promethos Kolophon, de Andropompos und de Andraimon Lebedos, de Damasos und de Naoklos Teos un de Knops Erythrai. D Sage sind nume aadütet und tailwiis echli widersprüchlich. En andere Kolonist vo Teos isch de Apoikos gsii, ebefalls e Neleid.

Historischi Gschlechter vo Athen

Verschidnigi athenischi Gschlechter hend sich grüemt, Noofare vo de Neleide zsii, so d Phraside, wo bhoptet hend, de Phrasis, Soo vom Neleus, sai ere Stammvatter.

D Alkmaionide hend de as ere mythischi Stammvatter de Alkmaion aaglueget, e Soo vom Sillos und Enkel vom Thrasymedes und d Paionide hett as mythische Stammvatter de Paion aggee, wo e Soo vom Antilochos gsii sai. D Peisistradide e dritts athenisches Gschlecht het as Stammvatter de Peisistratos aglueget, de jüngsti Soo vom Nestor.