Hauptmenü ufmache

De Neleus (altgriech Νηλεύς) isch i de griechische Mythologii de König vo Pylos gsii und de Stammvatter vo de Neleide.

De Neleus isch de Soo vom Poseidon und vo de Tyro und de Zwilling vom Pelias. Sini Frau isch d Chloris und si hend drizee Chind ghaa: de Periklymenos isch de de ältist und de Nestor de jüngsti Soo, di andere haisset: Tauros, Asterios, Pylaon, Deimachos, Eurybios, Epilaos, Phrasios, Eurymenes, Euagoras.[1] De Name vo de Töchter isch Pero.

D Tyro, d Muetter vom Neleus isch d Töchter vom Salmoneus, em König vo Pisa. Si hett sich in Flussgott Enipeus verliebt und isch immer am Flussufer glege. De Poseidon hett si gsie und d Gstaalt vom Enipeus agnoo und mit de Tyro Sex ghaa. Wo si schwanger woren isch, isch si vo de Stüüfmuetter Sidero plooget wore. D Tyro hett denn Zwilling uf d Welt broocht, de Neleus und de Pelias. D Tyro hett de Kretheus ghüroote, de König vo Iolkos, wo di beede Buebe uufgwachse sind. De Aristoteles hett aber gschribe, as d Büebli ufeme Böötli uusgsetzt wore saied und as Rosshirte die uufzoge hebid. Aineweeg, well de Pelias hett wöle nochem Tood vom Kretheus elai z Iolkos regiere, hett er de Neleus vertribe.

De Neleus isch zom Aphareus uf d Peloponnes choo und hett vo dem e Chüstestraiffe öberchoo. Er hett sin Palast z Pylos ghaa und siis Riich isch im Norde, noch de Aagoobe vo de Ilias, bis an Fluss Alpheios ggange. De Neleus hett sich gwaigeret de Herakles z entsüüne, wo de de Iphitos umbroocht ghaa hett, well er mit dem sin Vatter Eurytos guet bifründet gsii isch. De Herakles hett dromm müese e Joor lang i Frauechlaider bi de lydische Königi Omphale tiene. Uus Raach för die Schmaach het er denn de Neleus aagriffe und all sini Söö sind i dem Champf umchoo, ussert de jungi Nestor, wo doozmool z Gerenia gsii isch. De isch denn nochem Tood vom Neleus König vo Pylos wore.

De Neleus hett witter z Pylos regiert und isch im Alter uf Korinth, woner annere Chrangget gstorben isch. Siis Grab dai isch ghaim bhalte wore und nöd emole em Nestor isches zaigt wore.

NoowiisBearbeite

  1. Apollodor: Bibliotheke 1.9.9

LiteratuurBearbeite

  • Jan Stenger: Neleus. In: Der Neue Pauly (DNP). Band 8, Metzler, Stuttgart 2000, ISBN 3-476-01478-9, Sp. 809.
  • Edward Tripp: Reclams Lexikon der Antike Philipp Reclam jun. Stuttgart (1991), 5. Uuflaag. Lemma: Neleus, S. 358f.