D Familie Ochs

D Familie Ochs isch vom 17. Joorhundert bis zum Aafang vom 19. Joorhundert e bedütends Baasler Gschlächt gsi. Wäge de politische Umständ nennt sich d Familie sithär His.

Dr Peter Ochs, dr bekanntist Verdräter vo dr Baasler Familie Ochs

Dialäkt: Baseldütsch

Gschicht

D Familie isch ursprünglig us Stuttgart gsi und wird dört vom 15. Joorhundert aa urkundlig erwäänt. 1643 het dr Kaufmaa und Finansiee Hans Georg Ochs (1614–80) s Baasler Bürgerrächt überchoo und isch vo 1671 aa im Groosse Root gsässe. Vo denn aa si d Söön vo dr Familie bis ins 19. Joorhundert vor allem Kauflüt und Bankiee gsi, si Zumft- und Oberstzumftmäister worde und si im Groossroot gsässe.

Zu de bedütende Verdräter vo dr Famile het dr Kaufmaa Hans Georg Ochs (1657–92) ghöört, wo gegen die revoluzionäri Bürgerbeweegig vo 1691, wo vo de Zümft organisiert worde isch, kämpft het und, wo die zämmedätscht worde isch, in Groossroot gweelt worde isch.

Anderi wichdigi Ochs si dr Bankiee und Zumftmäister Karl Wilhelm (1700–53) und dr Bankiee und Groossroot Johann Caspar (1701–52). Die bäide häi s Undernääme «Gebrüder Ochs» gründet, wo zerst mit Lääbesmiddel ghandlet het und spööter e bedütends internazionals Bankhuus worde isch.

Dr Grosskaufmaa und Groossroot Albrecht Ochs (1716–80) het vo sim Schwiigervater Pierre His (1692–1760) s bedütendste Handelshuus in Hamburg übernoo und dr Groosskaufmaa und Bankiee Peter Ochs (1729–1804) isch z Wien e Hofbankiee worde.

Am bekanntiste vo de Ochs isch aber dr Rootschriiber und Oberstzumftmäister Peter Ochs (1752–1821). Er het sich noch dr Franzöösische Revoluzioon z Baasel für witgehendi Reforme iigsetzt, und sini Bemüejige häi im Januar 1798 in ere umbluetige Revoluzioon gändet. Er het d Verfassig für die Helvetischi Republik gschriibe, wo vom franzöösische Direktorium im Sinn vo de Franzoose gänderet worde isch und denn de Schwizer meer oder weniger ufzwunge worde isch. Das Dokumänt isch as Ochse-Büechli in wiite Kräis vo dr Schwizer Bevölkerig verhasst gsi. Si Verfasser isch wäge sinere Rolle wääred dr Helvetik langi Zit aagfindet worde und dä Hass het sich au gege sini Chinder grichdet, so dass sini Söön Georg Friedrich (1782–1844) und Eduard 1818 bzw. 1819 dr Familienaame vo iirem Urgrossvater Pierre His aagnoo häi. Dr Naame Ochs isch vo denn aa nüme brucht worde.

E baar Verdräter vo dr Familie His si bedütendi Juriste und Mediziner gsi und es git au hüte no His, wo in dr Region Baasel lääbe.

Kwelle

• Thomas Schibler: Ochs. In: Historisches Lexikon vo dr Schwiiz.