Pierre-Maurice Glayre

Dr Pierre-Maurice Glayre (* 25. Juli 1743 z Romainmôtier; † 26. Merz 1819 z Lausanne) isch e Schwiizer Politiker und Diplomat gsi. Er het as Unitarier, as Verfächter vom Schwiizer Eiheitsstaat, gulte.

Dr Pierre-Maurice Glayre in dr Amtsdracht vom ene Mitgliid vom Diräktorium vo dr Helvetische Republik.

Läbe ändere

Dr Glayre het Rächtswüsseschafte z Lausanne an dr Akademii studiert. 1764 het er d Stell vom ene Privatsekretär und Beroter vom polnische König Stanislaus II. August Poniatowski aagnoh. In däm siim Ufdrag isch er as Diplomat an die europäische Höf z St. Petersburg, Wien, Berlin und Paris gschiggt worde. 1771 het dr Glayre die polnischi Staatsaaghörigkeit übercho.

1787 isch er in d Waadt zrugg, het 1788 aber non e diplomatischi Mission z Paris im Ufdrag vom polnische König übernoh. Dr Glayre het mit de waadtländische Patriote sympathisiert, wo sich gege d Fremdherrschaft vo Bärn grichtet hai. 1797 het er em Root vo Lausanne vorgschlage, d Ständ vo dr Waadt iizberüefe, was in den Auge vo Bärn e revolutionäre Akt gsi isch. 1798 isch dr Glayre zum Presidänt vo dr provisorische Versammlig vo dr Waadt ernennt worde. Er het noch dr französische Intervention in dr Alte Eidgenosseschaft dr Helvetisch Eiheitsstaat understützt und e ganzi Reihe vo politische Ämter in de Gremie vo dr neue Republik übernoh. So isch er Prefäkt vom Kanton Léman und Mitgliid vom helvetische Direktorium worde. Vom 10. Januar 1799 bis zu siim Rückdritt us Gsundheitsgründ im Mai vom gliiche Johr isch er Presidänt vom Diräktorium gsi.

Im Juli 1799 isch dr Glayre noch Paris gschiggt worde und het dört vergäbe brobiert französischi Garantie für d Neutralitet vo dr Helvetische Republik im Zweite Koalitionschrieg überzcho. Noch em erste Staatsstreich im Januar 1800, wo s Diräktorium abgschafft worden isch, het dr Glayre immer wider Ämter in de Exekutivorgan vo dr Helvetische Republik bsetzt: Nodäm dr Vollziehigsusschuss s Direktorium ersetzt het isch dört Mitgliid worde und noch em zweite Staatsstreich im 1. Vollziehigsroot. Noch em Stäcklichrieg im Herbst 1802 het er sich us dr nationale Politik zruggzoge und isch nume no uf dr Ebeni vom Kanton Waadt, wo mit dr Mediationsakte erschaffe worden isch, dätig gsi. Er isch Mitgliid vo dr Kommission gsi, wo sich mit dr Gründig und Organisation vom Kanton beschäftigt het, und vo 1803 bis 1813 isch er Mitgliid vom waadtländische Grosse Root gsi. 1819 isch dr Glayre z Lausanne gstorbe.

Dr Glayre isch Freimuurer gsi. Er isch bi dene wohrschiinlig währed siiner Ziit z Pole biidräte. 1810 isch er Grossmeister vo dr Loge Grand Orient national helvétique romand worde.

Si einzigi Dochter Susanne Glayre (1788–1876) het 1809 dr Charles-Antoine de Lerber (1784–1837) ghürotet. Dr Pierre-Maurice Glayre isch Bürger vo Lausanne, Romainmôtier und Arnex-sur-Orbe gsi, won er 1788 s Schloss Arnex kauft het.

E knappi Autobiographii in dr Form vo drei Brief an dr Heinrich Zschokke, wo dr Glayre din über si Läbe bis 1804 brichtet, befindet sich im Staatsarchiv Aargau z Aarau.

Weblingg ändere

  Dä Artikel basiert uff ere fräie Übersetzig vu dere Version vum Artikel „Pierre-Maurice_Glayre“ vu de dütsche Wikipedia. E Liste vu de Autore un Versione isch do z finde.