SBB RABDe 8/16
D'r RABDe 8/16 isch ä Vorortstriebzug vu de Schwiizerische Bundesbahne, wo hüt nüm exischtiert. Vier Prototype sind im 1970 für di Rächtsufrig Züriseeliniä buut wordä. Si hend e Wiiterentwigglig vum SBB RABDe 12/12 dargschtellt wu ebäfalls für diä Liniä vorgseh gsii ischt. Fabriziärt hät si di Schwiizerisch Wagonfabrigg in Schliärä, d' Schindler Waggon in Prattälä, di Schwiizerisch Industrie-Gsellschaft z' Nüühuse am Rhifall und d' Société Anonyme des Ateliers de Sécheron z' Gämf. Im Pflichtäheft isch äs Diänschtgwicht vu 149 Tonnä vorgschribe gsii, und zum das iihalte hend's sich für ä Liächtbuuwiis us Aluminium entschidä. Will sich bim Buue d'r Wagäbode wie-n-e Bananä verboge het, het d'r Zug de Biiname „Chiquita“ überchuu. S' eerscht Mal het mer uf Gliichrichtertechnik gsetzt, was aber zu Problem gfüehrt het.
| SBB RABDe 8/16 | |
|---|---|
 | |
| Betriib | |
| Baujohr | 1976 |
| Betriibsnummere | 2001 – 2004 |
| Betriibsnummere (UIC) | RABDe 511 000 – RABDe 511 003 |
| Stückzahl | 4 |
| Stückzahl hüte | 0 |
| Isatzgebiet | Regionalverkehr |
| Usrangierig | 30. September 1997 |
| Technischi Daten | |
| Fahrzügtyp | elektrische Driibzug (Thyristortechnik) |
| Hersteller | SWS Schlieren SIG Neuhuuse SAAS Genève Schindler Waggon Brattele |
| Achsefolg | Bo'Bo'+2'2'+2'2'+Bo'Bo' |
| Höchstgschwindigkeit | 125 km/h |
| Leistig | 2250 kW bi 81 km/h |
| Stundezugkraft | 100 kN |
| Afahrzugkraft | 187 kN |
| Mäss und Gwicht | |
| Lengi über Puffer | 100'000 mm |
| Breiti | ? mm |
| Höchi | ? mm |
| Gwicht | 149 t |
| Ausstattig | |
| Zugformation | RBe-B-AD-RBe |
| Sitzplätz | 278 |
| in dr erste Klass | 54 |
| in dr zweite Klass | 224 |
| Sustigs | |
| Bsunderi Merkmol | Ersti Fahrzüg in Liichtmetallbauwiis |
| Vorgänger | RABDe 12/12 |
| Nochfolger | RBDe 560, Re 450 |
Dur sin violett-gäle Aaschtrich isch er augefällig gsii. (Gliichziitig sind bi de SBB fascht alli Personezüg tannegrüen gsii.) Mängmal het di automatisch Türöffnig nüd funktioniert.
Wu im 1992 und im 1993 d' Vorberäitige für d' Bahn 2000 uf Hochtuure gloffe sind, hend Marketingfachlüt vu d'r SBB d' Idee gchaa, em Personenahverchehr ä äinhäitlichi Farbgebig z' verpasse. I derä Ziit hend schu di Nüüe Pändelzüüg und d' Doppelstoggzüg vu d'r Zürcher S-Bahn ä blau-wiisse Aaschtrich gcha, und so het mer i denä Jahr zwii vu de vier „Chiquitas“ gliich aagmalet. Mer het si uf d' Liniä zwüschä Winterthur und Stäi am Rhii iigsetzt. Dänn sind aber alli nüm betriebstauglich gsii und mer hät si uf Glarus uf es Abschtellgläis bracht. Einere Komposiziuu hend's ä Wage druus gnoo, und si isch a d' Mittelthurgaubahn vermiätät wordä.
S' isch d' Buuräihe vu de SBB gsii mit d'r chürzischte Betriebsduur. Trotzdem isch d' Schnällzugsloggi SBB Re 4/4 IV ä Wiiterentwigglig vu dem Typ.