Regierigsbezirk

Vertikali Verwaltigsschtruktur vo Düütschland

I gwüsse dütsche Länder isch e Regierigsbezirk e Bezirk, wo vom ene Regierigspräsidium gleitet wird und für Uufgabe us verschiidene Ressorts zueständig isch. E sonigi Landesmittelbehörde cha «Regierig» oder «Bezirksregierig» heisse. D Regierigspräsidie schtönd als Mittelinschtanz (Landesmittelbehörde) zwüsched dr Minischterialebeni und de Kommune (bzw. undere Landesbehörde). In vilne Bundesländer exischtiert die Verwaltigsebeni nöd oder nüme.

In fast allne Bundesländer wird diskutiert, d Regierigspräsidie abzschaffe und d Uufgabe uf d Minischterial- bzw. di kommunali Ebeni z verlagere. Nur in Bade-Württeberg hät mer mit ere d Verwaltigsreform 2005 d Regierigspräsidie geschtärcht und ihne viili Uufgabe übertreit, wo vorane vo eigeschtändige Landesbehörde usgfüert worde sind.

Gschicht

Scho 1815/16 hät Preusse siis Schtaatsgebiet i Provinze und Regierigsbezirk glideret. Während dr Ziit vom Düütsche Riich häts ebefalls Regierigsbezirk als Mittelinschtanz vo dr schtaatliche Verwaltig geeh. Nach 1945 sind si i de grössere Flächeschtaate wider als schtaatlichi Mittelinschtanz iigrichtet worde. D Verwaltigsbehörde für d Regierigsbezirk, wo sich d Grenze im Lauf vo ihrer Gschicht verschideni Mal geänderet händ, sind entweder «Regierigspräsidium», «Regierig», «Dr Regierigspräsident» oder «Bezirksregierig» gnännt worde. Leiter vo dene Behörde isch im allgemeine dr Regierigspräsident gsi. In andere Flächeschtaate häts ähnlichi Verwaltigseinheite mit underschiedliche Bezeichnige ggää, z. B. «Chreishauptmannschaft» (in Sachse) oder «Chreis» (nöd z verwechsle mit de hütige Chreise).

Regierigsbezirk

In dene düütsche Länder gits Regierigsbezirk:

• Bade-Würteberg – 4 Regierigsbezirk: Friburg, Charlsrueh, Stuegert, Tübinge (bis 1973 Nordbade, Südbade, Nordwürteberg, Südwürteberg-Hohezollere)
• Bayre – Bezirk vo de 7 Regierige: Oberbayern, Niederbayern, Oberfranke, Mittelfranke, Underfranke, Oberpfalz, Schwabe
  (Nöd z verwechsle mit de 7 deckigsgliiche Bezirk mit gliiche Näme)
• Hesse – 3 Regierigsbezirk: Darmschtadt, Giesse, Kassel
• Nordrhy-Weschtfaale – 5 Bezirksregierige: Arnsberg, Detmold, Düsseldorf, Köln, Münschter

I dene Länder sind d Regierigsbezirk abgschafft worde:

• Rhyland-Pfalz (1999)
• Sachse-Anhalt (2003)
• Nidersaxe (2004)
• Sachse (2012)

Dä Artikel basiert uff ere fräie Übersetzig vum Artikel „Regierungsbezirk“ vu de dütsche Wikipedia. E Liste vu de Autore un Versione isch do z finde.